पथरी शनिश्चरे । मोरङको पथरी शनिश्चरे १० स्थित जागृति टोलकी आगलागी पिडीत मनमाया राईको परिवारलाई आज नगरपालिका कार्यालयले राहत वितरण गरेको छ । नगर उपप्रमुख यमुना विष्ट वास्तोलाको अगुवाईमा १० नम्बर वडाकी कार्यवाहक अध्यक्ष मैनादेवी फूयल आचार्य, वडा सदस्य मनकुमारी विश्कर्मा र अनोज घिमिरेले नगरले व्यवस्थापन गरेको लत्ताकपडा, भाडावर्तन, खाद्यान्न सहितको राहत सामग्री वितरण गर्नुभयो । वडा सदस्य विश्वकर्माले भनें आफ्नो व्यक्तिगत रुपमा समेत लुगा प्रदान गरे ।
आज विहान ९ बजेको समयमा विद्युत सर्ट भई भएको आगलागीबाट राईको जस्तापाताको छानो भएको काठे घर जलेर सम्पूर्ण सामान नष्ट हुँदा करीव १५ लाख रुपैयाँ बराबरको क्षति भएको छ । स्थानीय चन्द्रज्योति क्लबले परिवारलाई राहत स्वरुप ३२ हजार नगद प्रदान गर्नुका साथै बाँस सहयोग जुटाएर श्रमदान गरी तत्काल बस्नका लागि टहरा निर्माण कार्य अघि बढाएको छ ।
