काठमाडौं । माओवादी केन्द्रका अध्यक्ष पुष्पकमल दाहाल प्रचण्डले वैशाख २२ गते एमाले र माओवादीको पार्टी एकीकरण हुन सक्ने संकेत दिनुभएको छ ।
अन्तर्राष्ट्रिय श्रमिक दिवसको अवसर पारेर काठमाडौंमा गरिएको एक कार्यक्रममा बोल्दै प्रचण्डले पार्टी एकताको अभियान अन्तिम चरणमा पुगेको बताउनु भयो । ‘२२ गते माक्र्सको द्विशतवार्षिकी मनाउँदै छौं,’ उहाँले भन्नुभयो, ‘सोही दिन केही न केही प्रगति अवश्य देखिने छ ।’
उहाँले अहिले पार्टी एकीकरणको एजेन्डाबाट पछि हट्ने अवस्था नरहेको समेत बताउनु भएको छ । पार्टी एकताको विषय अवसर भएकोले यो अवसरबाट पछि हट्न नहुने समेत उहाँले बताउनु भये । ‘हामी एकताभन्दा बाहिर कल्पना पनि गर्न सक्दैनौं,’ उहाँले भन्नुभयो, ‘कम्युनिस्ट पार्टी एकता गर्ने, राजनीतिक स्थायीत्व कायम गर्ने र विकास निर्माणमा अघि बढ्ने हाम्रो एजेन्डा हो ।’
उहाँले समाजवादको आधार निर्माण गरेर अघि बढ्नुपर्ने समेत बताउनु भयो । पार्टी एकता गरेर नेपालमा मात्रै होइन विश्वमा समेत सन्देश दिन खोजेको प्रचण्डको भनाइ थियो ।
कार्यक्रममा उपस्थित भएका विश्व ट्रेड युनियन महासंघका अध्यक्षलाई सम्बोधन गर्दै प्रचण्डले आफूहरू साउथ अफ्रिकाको कम्युनिस्ट आन्दोलनबाट निकै प्रभावित भएको र सम्वृद्ध नेपाल निर्माण गर्ने अभियानमा रहेको समेत बताउनु भयो ।