काठमाडौ । नेकपा स्थापना दिवसको अवसरमा पार्टी एकताको घोषणा गर्ने तयारी गरिरहेका दुई कम्युनिष्ट पार्टी नेकपा एमाले र माओवादी केन्द्रले नेकपाको स्थापना दिवस भने सँगै मनाउने भएका छन् ।
कार्यक्रममा एमालेका अध्यक्ष तथा प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डले कार्यकर्तालाई संयुक्तरूपमा सम्बोधन गर्ने छन् । पार्टी एकता संयोजन समितिले स्थापना दिवसको कार्यक्रम राष्ट्रिय सभागृहमा दिनको १२ बजे कार्यक्रमको आयोजना गरेको छ ।
यस अघि दुई कार्यदलले संयोजन समितिलाई एकताको लागि वैशाख ९ गते पार्टी एकता गर्न सुझाव दिएका थिए । दुई अध्यक्षबीच पटकपटक पार्टी एकताको विषयमा छलफल भइरहेपनि ठोस सहमति भने जुट्न सकेको छैन ।
एकीकृत पार्टीको केन्द्रीय समितिमा प्रतिनिधित्वलगायतका विषयमा कुरा नमिल्दा आइतबार गर्ने भनिएको एकता घोषणा टरेको छ । माओवादी केन्द्रले बराबरी हैसियतमा एकता हुनुपर्ने बताउँदै आएको छ । एमालेले आफू ठूलो दल भएकाले त्यसलाई स्वीकार्न नसकिने अडान राख्दै आएको छ ।
