पाँचथर । पाँचथरको हिलिहाङ गाउँपालिका–७ का वडाध्यक्षको मृत्यु प्रकरणमा मुछिएका बाबुछोरा पक्राउ परेका छन् । वडाध्यक्ष तिम्सिनालाई कुटपिट गरेको आरोप लागेका बाबु भीम योक्पाङदेन र छोरा सुवास योक्पाङदेनलाई पाँचथर प्रहरीले शनिबार साँझ पक्राउ गरेको हो ।
हिलिहाङ गाउँपालिका–७ को सिम्वेवामा मोटरबाटो अनुगमनको क्रममा तिम्सिनालाई कुटिपट गरिएको थियो । तिम्सिनाले चैत्र १५ गते स्काभेटर लगाएर सडक निर्माण गर्दा योक्पाङदेनको घरमा लगेको बिजुलीको तार चुँडिएको थियो । सोही विषयलाई लिएर आफूमाथि हातपात भएको भन्दै प्रहरीमा उजुरी दिएका तिम्सिनाको शुक्रबारर निधन भएको थियो ।
तिम्सिनाकी धर्मपत्नीले शनिबार नै कुटपिटमा संलग्न भनिएका बाबुछोराविरुद्ध कर्तव्य ज्यानको मुद्दा दर्ता गराएकी छन् । तिम्सिनाको मुत्या कुटपिटकै कारण भएको हो वा होइन त्यो भने पोस्टमार्टमको रिपोर्ट आएपछि मात्र थाहा हुने प्रहरीले जनाएको छ ।
सडक निर्माणका क्रममा स्काभेटर लगाउँदा घरमा जोड्ने बिजुलीको तार छिनेको विषयलाई लिएर तिम्सिनालाई कुटपिट गरिएको प्रहरीले जनाएको छ । तिम्सिनाले बिहीबार आफूमाथि भएको कुटपिटको विषयमा पीडकमाथि सार्वजनिक अपराध ऐनअन्तर्गत कारबाही गर्न जिल्ला प्रहरी कार्यालय पाँचथरमा उजुरी दर्ता गराएका थिए ।
कुटपिटपछि शारीरिक र मानसिक रूपमा कमजोर भएका उनलाई उपचारका लागि फिदिमस्थित पाथीभरा अस्पतालमा भर्ना गरिएको थियो । त्यहाँबाट चिकित्सकले रेफर गरेपछि उपचारका लागि झापा लैजाँदै गर्दा इलामको नेपालटार पुगेपछि उनको मृत्यु भएको हो ।
