सप्तरी । सप्तरीको विष्णुपुर गाउँपालिका–७ का २२ बर्षीय अनिलकुमार साहलाई गाउँपालिकाका अध्यक्षले कुटपिट गरी घाइते बनाएका छन् ।
घाइते साह हाल राजविराज स्थित गजेन्द्रनारायण सिंह सगरमाथा अञ्चअ अस्पतालमा उपचार गराईराखेका छन् । गाउँपालिका अध्यक्ष लिलाम्बर यादव तथा परिवारका अन्य सदस्यहरुको कुटपिटबाट साह घाइते भएका हुन् । घाइते साहको छाती, कम्मपर, पेट, पिठ्यूँ लगायत शरिरका विभिन्न भागमा चोटपटक रहेको उपचारमा संलग्न चिकित्सकहरुले बताएका छन् ।
न्यायको गुहार माग्न जाँदा आफुमाथि अध्यक्ष यादवलगायत उनका परिवारजनसमेतले निर्घात कुटपिट गरेको पीडितको भनाइ छ । केही दिन अघिदेखि गाउँमा चोरीका घटनाहरु बढेको र उक्त कार्यमा अध्यक्षकै भतिजा सचिनकुमार यादवको संलग्नता रहेको साहले बताएपछि अध्यक्ष यादव उनीमाथि जाइलागेको स्थानीयले बताएका छन् ।
अध्यक्ष यादवले चोरीमा भतिजाको संलग्नता स्वीकार गरेको तर अनिललाई कुटपिट गरेको पीडितका काका लोचन साहले बताउनुभयो । चोरीमा भतिजाको संलग्नता रहेपनि छानविन गरी दोषिलाई कारवाही गर्ने प्रतिवद्धता सार्वजनिक रुपमै जनाएका यादवले भित्री रुपमा भने लोचनको संरक्षण गरेको दावी स्थानीयले गरेका छन् ।
चोरीको घटनाबारे सार्वजनिक रुपमा आफ्नो नाम लिएको भन्दै सचिनले लोचनलाई धम्की दिँदै आएका थिए । शनिबार अध्यक्षको घरमा धम्कीबारे गुहार माग्न जाँदा अध्यक्ष यादव, उनका भतिजा सचिनलगायतका परिवारका सदस्यले कुटपिट गरेका हुन् ।
गाउँपालिका अध्यक्ष यादवले चोरिको आरोपसहित घरमै आएर अभद्रशैलीमा प्रस्तुत भएका कारण अनिललाई परिवारका सदस्यहरुले समान्य हातपात गरेको बताएका छन् । घरमै आएर गालिगलौज गर्न थालेपछि परिवारका सदस्यहरुसँग उसको समान्य हातपात हुन गएको उनको भनाइ छ ।
पीडित पक्षले गाउँपालिका अध्यक्ष लगायतका आरोपिहरुमाथि कानुनी कारवाही गर्नुपर्ने माग गरेका छन् । आफ्नो पसलमा यस अघि पनि तीन÷चार पटक चोरि भईसकेको जानकारी गराउँदै लोचनले सुनियोजित तरिकावाट चोरिका आरोपिलाई जोगाउन अध्यक्ष लागिपरेको आरोप लगाए ।
