काठमाडौं । प्रतिनिधिसभाको उपसभामुखमा नेकपा एमालेका शिवमायाँ तुम्बाहाम्फे र नेपाली काँग्रेसका पुष्पा भुसालको उम्मेदवारी दर्ता भएको छ ।
संसद भवनमा बिहीबार दुबैले उम्मेदवारी दर्ता गरेका हुन् । तुम्बाहाम्फेको प्रस्तावकमा माओवादी केन्द्रका सांसद देव गु?ङ र समर्थक एमालेको सांसद रवीन्द्र अधिकारी छन् । यस्तै भुसालको प्रस्तावकमा काँग्रेस सांसद डिला संग्रौला र समर्थकमा देवेन्द्रराज कँडेल रहेका छन् ।
उम्मेदवारी दिएकी भुसाल यसअघि पनि सभासद रहिसकेकी नेतृ हुन् । तुम्बाहाम्फे भने पहिलो पटक संसदमा उपस्थिति जनाएकी हुन् । दुबै समानुपातिक सांसद हुन् ।
उम्मेदवारी दिएपछि भुसालले प्रतिपक्षीले संसदमा प्रभावकारी भूमिका खेल्ने भएकोले सरकार पक्षले आफूलाई समर्थन गर्नुपर्ने जिकिर गर्नुभएको थियो । यसअघि कांग्रेसले सभामुखमा भने पार्टीको तर्फबाट उम्मदेवारी दिएको थिएन ।
प्रतिनिधिसभाको उपसभामुखको निर्वाचन शुक्रबार हुँदैछ । प्रतिनिधिसभाका सभामुखको निर्वाचन गत फागुन २६ गते सम्पन्न भएको थियो । सभामुखमा नेकपा माओवादी केन्द्रका नेता कृष्णबहादुर महरा निर्विरोध निर्वाचित भइसक्नुभएको छ ।
संविधानको धारा ९१ मा प्रतिनिधिसभाको पहिलो बैठक प्रारम्भ भएको मितिले १५ दिनभित्र सभामुख र उपसभामुखको निर्वाचन गरिसक्नुपर्ने व्यवस्था छ । प्रतिनिधिसभाको पहिलो बैठक गत फागुन २१ गते बसेको थियो ।