काठमाडौं । प्रतिनिधिसभा सभामुखमा नेकपा माओवादी केन्द्रका नेता कृष्णबहादुर महरा निर्विरोध निर्वाचित हुनुभएको छ ।
सभामुखका लागि शुक्रबार उम्मेदवारी दर्ताको कार्यसुची रहेकोमा महराको मात्र उम्मेदवारी परेकोले निर्वाचित हुनुभएको हो ।
महरा निर्वाचित भएको औपचारिक घोषणा भने शनिबार हुनेछ । प्रतिनिधिसभामा बाम गठबन्धनको दुईतिहाई नजिक मत रहेकोले प्रमुख प्रतिपक्षी दल काँग्रेसले सभामुखमा उम्ेमदवारी दिएन । यद्यपी उसले उपसभामुख पद पाउनुपर्ने माग गरेको छ ।
उम्मेदवारी दर्तापछि महराले संविधान कार्यान्वयन चुनौतीपूर्ण रहेको र धेरै कानुनहरु बनाउनु पर्ने भएकाले त्यसमा आफ्नो भूमिका रहने बताउनुभयो ।
महराको प्रस्तावकमा एमाले नेता एवं पूर्वसभामुख सुवास नेम्वाङ र समर्थकमा माओवादी केन्द्रका प्रमुख सचेतक देव गुरुङ रहनुभएको थियो ।
माओवादी केन्द्रले शुक्रबार विहान मात्र महरालाई सभामुखको उम्मेदवार बनाउने निर्णय गरेको थियो । प्रमुख प्रतिपक्षी दल काँग्रेसले सभामुखमा महराको सालिन व्यक्तित्व र सन्तुलित व्यवहारले संसद् र संसदीय पद्दतिको गरिमा अभिवृद्धि हुने विश्वाससहित आफ्नो पार्टीले उम्मेदवारी नदिने निर्णय गरेको जनाएको छ ।
