दिनचर्या कसरी विताई रहनु भएको छ ?
समूहको नियमित बैठकका साथै कहिलेकाहीं आकस्मिक बैठक पनि बस्नु पर्ने हुन्छ । यस्तै कहिले पदाधिकारीको मात्र पनि बैठक बस्नु पर्ने हुन्छ । यो सँगै कहिलेकाही वनमा छड्के गस्ती गर्ने र विभिन्न सामाजिक संघ संस्थाहरुमा पनि समय दिने गरेको छु ।
वनको क्षेत्रफल कति छ र यसबाट लाभ हासिल गर्ने उपभोक्ताहरुको संख्या कति छ ?
यो बसन्त हरियाली सामुदायिक वन उपभोक्ता समूह वि.सं. २०५६ सालमा स्थापना भएको हो । यस समूहको संस्थापक अध्यक्ष पूर्णबहादुर कुरुङवाङ हुनुहुन्थ्यो । त्यसपछि कृष्ण लुइटेल, सन्त राई हुँदै हाल होमनाथ सुबेदीको नेतृत्वमा समूहका गतिविधि अगाडि बढाइ रहेका छौं । यसको वन क्षेत्र ३३८ हेक्टर हो । उपभोक्ता घरधुरी संख्या हाल ५५० पुगेको छ ।
बसन्त हरियाली सामुदायिक वनले के कस्ता कामहरु गरिरहेको छ ?
अहिले वन विकासको काम भैरहेको छ । विरुवाहरु गोडमेल र विभिन्न ठाउँहरुमा विरुवा रोप्ने काम भैरहेको छ । यस वाहेक सामाजिक क्षेत्रमा बाटो निर्माणको लागि, विजुली विस्तार, मलामी खाजा घर निर्माणमा सहयोग गरेका छौं ।
समूहले वन पैदावर विक्रीबाट बार्षिक कति आम्दानी गर्छ ?
विगतमा वैज्ञानिक वन व्यवस्थान गर्दा करिव चार वर्षजति हाम्रो वार्षिक रुपमा करोडको हाराहारीमा आम्दानी हुन्थ्यो । पछि फेरी राज्यले नै वैज्ञानिक वन व्यवस्थापन कार्यविधि खारेज गरेपछि हामीले सामान्य कार्ययोजना बनाई ढलापडा काठ मात्र निकाल्न थाल्यौं । अहिले चाहीं काठदाउरा विक्रीबाट वार्षिक ७० लाख जति आम्दानी गर्ने गरेका छौं ।
यो आम्दानी कुन कुन क्षेत्रमा खर्च गर्नु हुन्छ ?
मुख्यतः वन विकास नै हो । त्यसपछि गरिवि न्युनिकरण, सामाजिक विकास र कार्यालय सञ्चालनमा खर्च गर्ने गरेका छौं ।
आगामी दिनमा के गर्ने योजना छ ?
हाम्रो आगामी योजना भनेको पर्यटकीय क्षेत्र बनाउने सोच छ । हाम्रो वनमा जलासय नभएतापनि अन्य कुराको पूर्वाधार निर्माण गरी बाहिरी पर्यटकलाई भित्र्याउने लक्ष्य र उद्देश्य छ । गाउँ टोलका गरिव उपभोक्ताहरुलाई निःशुल्क घर निर्माण गरिदिने र निःशुल्क तालिम दिन्छौ । तालिम लियो भने आफ्नो खुट्टामा उभिन्छन् ।
