काठमाडौं । कोरोना महामारीले नराम्ररी थलिएको नेपाललाई मित्रराष्ट्र अष्ट्रेलियाले ७ मिलियन अष्ट्रेलियन डलर अर्थात् ६३ करोड ४८ लाख रुपैयाँ सहायता प्रदान गर्ने घोषणा गरेको छ । अष्ट्रेलियाली दूतावासले निकालेको विज्ञप्तिमा यो कोभिड–१९ विरुद्ध नेपाललाई अतिरिक्त सहयोगको घोषणा भएको जनाएको छ ।
दक्षिण एशियाका नेपाल, बंगलादेश र श्रीलंकालाई दिने भनेको १७.५ मिलियन डलरकै एक हिस्साका रुपमा यो सहयोग नेपाललाई दिन लागिएको विज्ञप्तिमा भनिएको छ । सहयोगमा प्रदेश सरकारलाई अक्सिजन लगायतका जरुरी उपकरण र स्वास्थ्यकर्मीका लागि पीपीई लगायतका सामाग्री समावेश गरिएको छ । नेपालमा फैलिएको महामारीविरुद्ध युरोप, अमेरिका, जापान र राष्ट्रसंघीय निकायसँग मिलेर काम गर्ने पनि अष्ट्रेलियाले जनाएको छ ।
