काठमाडौं । आयोजक ललितपुर महानगरपालिकाले महानगर कप भलिबल अन्तर्गत पुरुषतर्फको उपाधि जितेको छ । जावलाखेल भलिबल प्रशिक्षण केन्द्रमा शुक्रबार भएको फाइनलमा चौतारा नगरपालिकालाई ३–१ को सेटमा पराजित गर्दै आयोजक ललितपुर च्याम्पियन बनेको हो ।
उपाधि जित्ने क्रममा ललितपुरले चौतारालाई २३–२५, २५–२०, २५–२१ र २५–१२ को सेटमा पराजित गर्यो । उपाधिसँगै ललितपुरले २ लाख नगद प्राप्त गरेको छ । उपविजेता बनेको चौताराले १ लाखमा चित्त बुझायो । तेस्रो भएको महालक्ष्मीले ५० हजार प्राप्त गर्यो । ललितपुर महानगरपालिकाले आफ्नो १ सय १ औं स्थापना दिवसको अवसरमा आयोजना गरेको प्रतियोगितामा सर्वोकृष्ट खेलाडी ललितपुरका हरि पाण्डे चुनिए । उनले १० हजार प्राप्त गरे ।
यस्तै उत्कृष्ट स्पाइकर ललितपुरका योगेन्द्र गुरुङ, ब्लकर महालक्ष्मीका शरद रावल, डिफेन्डर महालक्ष्मीका हरिस बुढाथोकी, सरभर महालक्ष्मीकै आयुस खड्का चुनिए । सेटर चौताराका विश्वास आले र प्रशिक्षक ललितपुरका मनोज खड्का चुनिए । व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले जनही ५र५ हजार प्राप्त गरे ।
महिलातर्फको उपाधि चन्द्रागिरी नगरपालिकाले जितेको छ । फाइनलमा आयोजक ललितपुर महानगरपालिकालाई ३–२ को सेटमा पराजित गर्दै चन्द्रागिरी च्याम्पियन बनेको हो । निकै रोमान्चक भएको फाइनलमा पहिलो सेट गुमाएपनि उत्कृष्ट पुनरागमन गर्दै चन्द्रागिरीले उपाधि जितेको हो ।
उपाधि जित्ने क्रममा चन्द्रागिरीले ललितपुरमाथि २३–२५, २५–१९, २५–१८, २१–२५ र १५–९ को जित निकाल्यो । उपाधिसँगै चन्द्रागिरीले २ लाख नगद प्राप्त गरेको छ । उपविजेता बनेको ललितपुरले १ लाखमा चित्त बुझायो । तेस्रो भएको गोकर्णेश्वरले ५० हजार प्राप्त गर्यो ।
ललितपुर महानगरपालिकाले आफ्नो १ सय १ औं स्थापना दिवसको अवसरमा आयोजना गरेको प्रतियोगितामा सर्वोकृष्ट खेलाडी चन्द्रागिरीकी झरना श्रेष्ठ चुनिइन् । उनले १० हजार प्राप्त गरिन् । यस्तै उत्कृष्ट स्पाइकर ललितपुरकी शर्मिला नेपाली, ब्लकर ललितपुरकी प्रवित्रा श्रीपाली, डिफेन्डर ललितपुरकी विमला सुनुवार चुनिइन् ।
उत्कृष्ट सर्भर चन्द्रागिरीकी पनामिका राई, सेटर चन्द्रागिरीकै प्रतिक्षा गुरुङ र प्रशिक्षक चन्द्रागिरीका कुमार राई चुनिए । व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले जनही ५र५ हजार प्राप्त गरे । प्रतियोगितामा पुरुषमा १३ र महिलामा ८ टिमको सहभागिता रहेको थियो ।
