पथरी । मोरङको पथरीशनिश्चरे–२ स्थित रेडस्टार माध्यमिक विद्यालय र ऋतम्भरा बहुमुखी क्याम्पसले भोटेकोशी नदीमा आएको बाढीबाट प्रभावित परिवारको राहतका लागि १ लाख ५५ हजार ५५५ रुपैयाँ सहयोग गरेको छ ।
विद्यालयले भदौ १० गते आएको बाढीबाट विस्थापित तथा प्रभावित नागरिकको सहयोगार्थ बिहीबार प्रधानमन्त्री दैवी प्रकोप उद्धार कोषमा उक्त रकम जम्मा गरेको हो ।
एक साताअघि आएको बाढीबाट प्रभावित परिवारलाई राहत पु¥याउने उद्देश्यले राष्ट्रिय वाणिज्य बैंकमार्फत उद्धार कोषमा रकम जम्मा गरिएको विद्यालयका प्रधानाध्यापक टेकनाथ तिम्सिना (टीएन)ले जानकारी दिए । “विपद्को यो घडीमा थोरै भए पनि राहत पुगोस् भन्ने उद्देश्यले हामीले स्वेच्छिक रूपमा रकम सहयोग गरेका हौँ,” प्रधानाध्यापक तिम्सिनाले भने ।
रसुवालगायत देशका विभिन्न क्षेत्रमा बाढी तथा पहिरोका कारण ठूलो जनधनको क्षति भइरहेका बेला पीडित परिवारको राहतमा सहयोग पु¥याउने उद्देश्यले विद्यालयले आफ्नो क्षमताअनुसार रकम उपलब्ध गराएको उनले बताए ।
तिम्सिनाले विपद्का कारण ज्यान गुमाएका नागरिकप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना प्रकट गरेका छन् । उनले घाइते तथा प्रभावित नागरिकको शीघ्र उद्धार, राहत तथा पुनःस्थापनाका लागि सम्बन्धित निकायलाई प्रभावकारी रूपमा काम गर्नसमेत आग्रह गरेका छन् । “सहयोगको रकम सानो हुन सक्छ, तर सहयोग गर्ने मन कहिल्यै सानो हुनु हुँदैन,” उनले भने ।
विपद्का समयमा व्यक्तिगत तथा व्यावसायिक हैसियतभन्दा मानवीय सहयोग महत्वपूर्ण हुने भएकाले विद्यालयको क्षमताअनुसार सहयोग गरिएको तिम्सिनाले बताए ।
शैक्षिक गुणस्तरमा अब्बल मानिँदै आएको रेडस्टार माध्यमिक विद्यालय र ऋतम्भरा बहुमुखी क्याम्पसले सामाजिक उत्तरदायित्वअन्तर्गत विभिन्न समयमा मानवीय तथा सामाजिक कार्यमा सहयोग गर्दै आएको जनाएको छ ।
