काठमाडौं । इरानमा एक यात्रीवाहक विमान दुर्घटना हुँदा १७६ जनाको मृत्यु भएको छ । युक्रेनको सो विमान बुधबार बिहान तेहराननजिकै दुर्घटना भएको हो । राजधानी तेहरानको इमाम खोमेनी अन्तर्रा्ष्ट्रिय विमानस्थलबाट उडान भरेलगत्तै बोइङ ७३७ विमान दुर्घटनामा परेको अन्तर्रा्ष्ट्रिय सन्चारमध्यमहरुले जनाएका छन् । इरानको उड्डयन संगठनका प्रवक्ताकाअनुसार विमानमा १६७ जना यात्री र चालकदलका ९ सदस्य सवार थिए । दुर्घटनाग्रस्त भएको युक्रेनी जहाजमा परेर मृत्यु हुनेमा सात देशका नागरिक रहेका छन् ।
जहाज दुर्घटनामा सबैभन्दा बढी इरानका नागरिक परेका छन् । घटनामा मृत्यु हुनेमा ८२ इरानी, ६३ क्यानेडेली, ११ युक्रेनी, १० स्विडेनी, ४ अफगानी, ३ जर्मन र ३ बेलायती नागरिक रहेको युक्रेनका परराष्ट्रमन्त्री भ्यादाइम प्रिस्टाइकोले ट्वीटरमा जानकारी दिएका छन् । उनीहरु सबैको मृत्यु भएको जनाइएको छ । सुरुमा विमानमा १८० जना सवार रहेको समाचार आएको थियो । विमान युक्रेनको राजधानी किभका लागि उडेको थियो । दुर्घटनाको यकिन कारण खुल्न सकेको छैन । इरानी समाचार एजेन्सी ‘फार्स’ले भने प्राविधिक समस्याका कारण विमान दुर्घटना भएको जनाएको छ । दुर्घटनास्थलमा उद्धार टोली खटाइएको छ ।
