काठमाडौं । १३ औं दक्षिण एसियाली खेलकुद प्रतियोगिता (साग) अन्तर्गत पौडीमा गौरिका सिंहले अर्को स्वर्ण पदक जितेकी छिन् । सातदोबाटोस्थित पौडी पोखरीमा आइतबार गौरिकाले ४ सय मिटर फ्रिस्टाइलमा स्वर्ण जितेकी हुन् ।
योसँगै गौरिकाले एकै सागमा तीन स्वर्ण जित्दै कीर्तिमान बनाएकी छिन् । ओलम्पियन गौरिकाले ४ मिनेट २५.२८ सेकेण्डको समय निकाल्दै स्वर्ण जितेकी हुन् ।
यस स्पर्धामा भारतकी शिवांगी शर्माले ४ मिनेट २६.२२ सेकेण्डको समय निकाल्दै रजत जितिन् । यस्तै ४ मिनेट ४१.९१ सेकेण्ड समय लगाएकी श्रीलंकाकी खेलाडीले कास्य जितिन् । ओलम्पियन गौरिकाले यस अघि २ सय मिटर ब्याकस्ट्रोक र २०० मिटर फ्रिस्टाईलमा स्वर्ण जितेकी थिइन् ।
पौडीकै २ सय मिटर बटरफ्लाईमा नेपालकी डुवाना लामाले रजत जितेकी छिन् । डुवानाले २ मिनेट ३३.१६ सेकेण्डको समय निकालिन । भारतकी अपेक्षा डिलेले २ मिनेट २१.८३ सेकेण्डसहित स्वर्ण जितिन् । बंगलादेशकी जुनेया अहमदले २ मिनेट ३३.७५ सेकेण्डसहित कास्य जितिन् ।
त्यसै गरी प्रतियोगिता (साग) अन्तर्गत जुडोमा नेपालकी देविका खड्काले स्वर्ण जितेकी छिन् । सातदोबाटोस्थित आर्मीको कभर्डहलमा देविकाले ५२ केजी मुनि तौल समूहमा नेपाललाई स्वर्ण दिलाएकी हुन् ।
स्वर्ण जित्ने क्रममा देविकाले भारतकी टोकास गायत्रीलाई पराजित गरिन् । यस स्पर्धामा बंगलादेश र श्रीलंकाले कास्य जित्यो । योसँगै नेपालको स्वर्ण संख्या ४५ पुगेको छ ।
जुडो अन्तर्गत नै पुरुष ६६ केजी मुनि नेपालका इन्द्र बहादुर श्रेष्ठले रजत जिते । फाइनलमा इन्द्र भारतका जस्लिन सिंहसँग पराजित भए । भुटान र पाकिस्तानका खेलाडीले कास्य जिते ।
महिला ५७ केजी मुनि नेपालकी मनिता श्रेष्ठ प्रधानले रजत जितिन् । मनिता फाइनलमा भारतका खेलाडीसँग पराजित भईन् । यस स्पर्धामा पाकिस्तान र श्रीलंकाले कास्य जित्यो । ४८ केजी मुनि नेपालकी सोमिया भट्टले कास्य जितिन् । भारतले स्वर्ण र श्रीलंकाले रजत जित्दा अर्को कास्य पाकिस्तान जित्यो ।
