पथरी । मोरङको पथरीशनिश्चरे नगरपालिकाले सुरु गरेको रेविज विरुद्धको अभियान सफल भएको छ । जसमा नगरपालिकाले पछिल्लो पटक ५ दिनको कार्यक्रममा सवै वडामा सो अभियान चलाएको थियो ।
रेविज विरुद्धको निःशुल्क पशु स्वास्थ्य शिविरमा दश वटै वडामा गरी २ सय ९८ वटा कुकुर र १३ वटा विरालोमा खोप लगाइएको पशुपंक्षी शाखा प्रमुख हेमचन्द्र दहालले जानकारी दिए ।
यसअघि १३ औं विश्व रेविज दिवशका अवसरमा वडा नम्वर ६ स्थित मंगलबारेमा रहेको पशु सेवा केन्द्रमा निःशुल्क शिविर सञ्चालन गरी खोप लगाउने अभियान थालिएको थियो । त्यहाँ ६० वटा कुकुर र ३ वटा विरालोलाई खोप लगाइएको थियो । पशु धनीलाई खोप लगाएको कार्ड समेत वितरण गरिएको छ ।
कृषि तथा पशुपंक्षी शाखाको कार्यक्रम
नगरपालिकाको कृषि तथा पशुपंक्षी शाखाका योजनामा परेका कार्यक्रमहरु तय भएका छन् ।
यामप्रसाद गुरागाईं संयोजक रहेको नगरको आर्थिक विकास समितिको वैठकले रेविज विरुद्धको अभियानको समेत समीक्षा गर्दै पशुपंक्षी शाखाको कार्यक्रम अन्तर्गत विपन्नहरुका लागि वडा नम्वर १, ३, ४, ९ र १० मा बंगुर पालन तथा २, ५, ६, ७ र ८ नम्वरमा वाख्रा पालन कार्यक्रम सञ्चालन गरिने निर्णय गरेको छ । यसैगरी, बाली विकास कार्यक्रम, बाली संरक्षण कार्यक्रम, कृषि प्रसार तथा यान्त्रिकरण कार्यक्रम, भकारो सुधार कार्यक्रम, घाँस वितरण कार्यक्रमहरु शाखाले सञ्चालन गर्ने निर्णय समेत भएको छ ।
