विराटनगर । विराटनगर स्थित एभरेष्ट सेकेण्डरी इङ्गिलस स्कूलले आफ्ना विद्यार्थीहरुलाई चाडपर्वको सांस्कृतिक महत्व बुझाएर दशै, तिहार र छठ पर्वको विदा दिएको छ ।
विराटनगर ५ स्थित स्कूलले एक कार्यक्रम आयोजना गरी विद्यार्थीहरुलाई चाडपर्वको महत्वबारे जानकारी दिँदै रमाइलो गराएर विदा दिएको हो ।
चाडपर्वको विदा दिँदै गर्दा ती पर्वहरुमा के–के हुन्छन्, कसरी पर्व मनाउने र ति पर्व हाम्रा लागि किन महत्वपूर्ण छन् भन्ने बुझाएर विदा दिएको स्कूलले जनाएको छ । कार्यक्रममा दशैका पोशाकमा सजिएर विद्यालय पुगेका बालबालिकालाई प्रिन्सिपल टिकाराम पुरीसहित शिक्षक र शिक्षिकाले टिका र जमरा लगाई दक्षिणासमेत दिएका थिए ।
बालबालिकाले किताबी ज्ञान मात्र नभएर आफ्नो संस्कृती, संस्कार र परम्पराबारे बुझाउन यस्तो कार्यक्रम गरेको विद्यालयका प्रिन्सिपल पुरीले बताउनुभयो । बाल्यअवस्थाबाटै संस्कृती बुझाउन सकिएमा उनीहरुमा सकारात्मक प्रभाब पर्ने उहाँको भनाइ छ ।
कार्यक्रममा गाउँले परिवेश झल्कने चिटिक्क परेको सानो घर, खसी, टाट्नो, मकै, ढिकी, जाँतो र डोकोलगायतका सामाग्रीहरु प्रदर्शनी गरिएको थियो । प्रदर्शनी देखेर बालबालिकासँगै अभिभावकहरुसमेत रमाएका थिए । बडादशैको नवरात्रमा पुजा गरिने ९ दुर्गाको रुपमा सजिएका स–साना बालबालिका र पर्व चिनाउने सामाग्रीहरुको प्रदर्शन रोचक देखिएको थियो ।
हरेक चाडपर्वका बेला यस्ता गतिविधिमा बालबालिकालाई प्रत्यक्ष सहभागी गराउँदै आएको एभरेष्टले लामो विदाका बेला मनाउने सबै पर्वका विषयमा जानकारी गराएको जनाएको छ । कार्यक्रमसहित स्कूलले कार्तिक २८ गतेसम्मका लागि चाडपर्व विदा दिएको छ ।
