विराटनगर । मोरङको बूढीगंगा गाउँपालिकास्थित अरिहन्त कार्टुन उद्योगमा आगलागी भएको छ । उद्योगमा बुधबार राति लागेको आगो नियन्त्रणका लिनका लागि मात्रै १६ घण्टा बढी लागेको थियो ।
राति १० बजेबाट सुरु भएको आगो बिहीबार दिउँसो २ बजे मात्रै नियन्त्रणमा आएको मोरङ प्रहरी प्रमुख एसपी मनोजकुमार केसीले जानकारी दिनुभयो । कार्टुन फ्याक्ट्रीमा लागेको आगो भित्रभित्रै सल्किएका कारण निभाउन समय लागेको थियो ।
विद्युत सर्ट भएर आगो लागेको हुनसक्ने अनुमान गरिएको छ । उक्त उद्योग पारस लुनियाले संचालन गरेका थिए । आगो नियन्त्रणका लागि मात्रै झापा, मोरङ, सुनसरी र सप्तरीदेखिका १० वटा दमकल परिचालन गरिएको थियो ।
दमकल, स्थानीय बासिन्दा, नेपाल र सशस्त्र प्रहरी एवं नेपाली सेना आगो नियन्त्रणमा खटिएका थिए । उद्योगका मेनेजर कपिल रेग्मीका अनुसार आगोमा जलेर गोदाममा भएका तयारी सामानहरु, उद्योगका मेसिनहरु, वेस्टेज पेपर पूर्ण रुपमा नष्ट भएको छ । आगोबाट भएको क्षतिको विवरण संकलन भइरहेको प्रहरीले जनाएको छ ।
