विराटनगर । विराटनगर महानगरपालिका ९ मेनरोडमा सञ्चालित सम्राट मनी ट्रान्सफरमा मंगलबार राति चोरी भएको छ ।
महानगरपालिका कार्यालयको ‘बी प्लट’ भवनको माथिल्लो तलामा सञ्चालन गरिएको मनी ट्रान्सफरको सटर फुटाएर चोरी गरिएको हो ।
मनी ट्रान्सफर विराटनगर महानगरपालिका ९ को वडा कार्यालयसँगै जोडिएको छ । मंगलबार साँझ बन्द गरेर हिँडेकोमा बुधबार बिहान आउँदा चोरी भएको पाइएको संचालक बाबुराम न्यौपानेले बताउनुभयो । बिहान ७ बजे गार्ड होमनाथ खतिवडाले सटरको माथिल्लो भाग फुटाएर चोरी भएको जानकारी दिएका थिए ।
मनी ट्रान्सफरबाट ५ लाख ५० हजार रुपैयाँ नगद, एउटा ल्यापटप, दुईवटा भिडियो क्यामेरा, एउटा कम्प्युटर, हस्ताक्षर गरेको चेकलगायतका सामान चोरी भएको न्यौपानेको दावी छ । सुरुमा पूर्वतर्फ रहेको काठको ढोका फुटाएर भित्र पसेपछि चोरले मनी ट्रान्सफरको सटरको माथिल्लो भाग फुटाएर चोरी गरेको पाइएको छ ।
वडा प्रहरी कार्यालय विराटनगरका डीएसपी सुरेन्द्र सिटौलाले भने घटना शंकास्पद भएको बताउनुभयो । सटर अलिकति मात्रै तोडिएको जस्तो रहेकोले घटनाका विषयमा विभिन्न कोणबाट अनुसन्धान सुरु गरिएको उहाँको भनाइ छ ।
प्रहरीले संचालक न्यौपानेसहित केही व्यक्तिमाथि नै अनुसन्धान अघि बढाइएको जनाएको छ । न्यौपानेसहित केहीको फिङ्गर प्रिन्ट पनि लिएको छ ।
