उर्लाबारी । मोरङको मिक्लाजुङ–६ बेतिनीका बाढी पीडितहरुले खानेपानी र शौचालयको समस्या भएको बताएका छन् । सञ्चार क्लब नेपाल उर्लाबारीको आयोजना गरेको कार्यक्रममा बाढी पीडित गोपाल हुमागाईले तीन बर्षदेखि कठिन तरिकाले जिविकोपार्जन गर्दै आएको गुनासो गरे ।
तत्काल शौचालय र खानेपानीको उचित प्रबन्ध मिलाइदिन उनले आग्रह गरेका छन् । स्थानीय मिक्लु सामुदायिक वनको खाली जग्गामा बसोबास गर्दै आएका २५ परिवार अझैसम्म घर फर्किन सकेका छैनन् । बाढीपीडितका समस्या समाधानका लागि पहलकदमी गर्ने उद्देश्यले मिक्लाजुङ गाउँपालिकाको साझेदारीमा बाढीपीडितहरुको स्वास्थ्य परीक्षणसमेत गरिएको छ ।
उर्लाबारीस्थित गोदावरी हस्पिटल प्रा.लि.को प्राविधिक टोलीले ४० जना बाढी पीडितहरुको स्वास्थ्य परीक्षण गरेको कार्यक्रम संयोजक केशब खड्काले जानकारी दिनुभया् । सोही अवसरमा नयाँ वर्ष २०७५ सालको शुभकामना आदानप्रदान कार्यक्रमसमेत गरिएको थियो । मिक्लाजुङ गाउँपालिकाका अध्यक्ष देबीप्रसाद आचार्यको प्रमुख आतिथ्यतामा भएको कार्यक्रममा वडा नं. ६ वडाध्यक्ष बुद्धिलाल निरौला, गोदावरी हस्पिटल प्रा.लि.का सञ्चालक प्रकाश चौहानलगायतको उपस्थिति थियो ।
गाउँपालिका प्रमुख आचार्यले विकास र समृद्धिलाई पहिलो प्राथमिकतामा राखेर गाउँपालिकाका अघि बढिरहेको बताउनुभयो । मिक्लाजुङका अधिकांश भू–भाग पहाडी क्षेत्र भएका र सडक, खानेपानी, विजुलीजस्ता आधारभूत कुराहरुका बढी समस्या रहेको उहाँको भनाइ छ ।
