सिरहा । पूर्व पश्चिम राजमार्गअन्तर्गत सप्तरीको सुरुङ्गा नगरपालिका–४ कदमाहामा शुक्रबार साँझ यात्रुबाहक बसको ठक्करबाट घाइते भएका दुई जनाको मृत्यु भएको छ ।
दुर्घटनामा घाइते भएका सप्तरीको कञ्चनरुप नगरपालिका–८ का ४० वर्षीय शम्भु स्वर्णकार र ३५ वर्षीय सन्दीप स्वर्णकारको मृत्यु भएका इलाका प्रहरी कार्यालय कडरबोनाले जनाएको छ ।
पश्चिमबाट पूर्वतर्फ जाँदै गरेको ना ५ ख ६०२ नम्बरको यात्रुबाहक बसले टायर पञ्चर भई अनियन्त्रित भएपछि सोही दिशामा जाँदै गरेको स ७ प ७१५० नम्बरको मोटरसाइकललाई ठक्कर दिएको थियो । ठक्करबाट मोटरसाइकलमा सवार दुबैजना गम्भीर घाइते भएका थिए ।
घाइतेमध्ये मोटरसाइकल चालक स्वर्णकारको उपचारका लागि लहानस्थित सप्तऋषि अस्पताल ल्याउने क्रममा बाटोमै मृत्यु भएको प्रहरीले जनाएको छ । सन्दीपको भने उपचारका लागि विराटनगरस्थित न्यूरो अस्पताल लैजाने क्रममा मृत्यु भएको हो । प्रहरीले ठक्कर दिने बस र चालकलाई प्रहरीले नियन्त्रण लिएको छ ।