विराटनगर । भारत जोगवनीको टिकुलीया वस्तीमा एक आपसमा झगडा हुँदा एक नेपालीको हत्या भएको छ । इटहरी–१० का ३५ वर्षिय कृष्णबहादुर सुनवार माथि खुकुरी प्रहार गरी आइतबार हत्या भएको हो ।
नेपाल–भारत सिमा क्षेत्र दशगजाको छेउमा पर्ने जोगवनीको टिकुलीया वस्तीमा ४/५ जनाको समूहले सुनुवारमाथि खुकुरी प्रहार गरी घाइते बनाएका थिए । घाइते भएका सुनुवारलाई तत्काल उद्धार गरी कोशी अञ्चल अस्पताल उपचारका लागि ल्याइएको भएपनि उनको अस्पतालमै मृत्यु भएको हो ।
सुनुवारमाथि खुट्टाको नली, तिघ्रामा खुकुरी प्रहार गरिएको थियो । अत्याधिक रगत बगेको कारण उनको मृत्यु भएको प्रहरीले जनाएको छ ।
इटहरीबाट जोगबनीको टिकुलिया बस्तीमा लागूऔषध सेवन गर्न गएका सुनवार र भारतीय युवाबीच आपसी विवाद हुँदा झगडा भएको प्रहरीको दाबी छ ।
‘लागूऔषध सेवन गर्न आएका सुनवार र भारतीयबीच एक आपसमा कुरा नमिल्दा झगडा भएको देखिन्छ,’ रानीका प्रहरी प्रमुख सन्तोष निरौले भन्नुभयो । जोगवनीको टिकुलिया बस्ती लागूऔषध प्रयोगकर्ताको अखडा मानिँदै आएको छ ।
हत्याको विषयमा थप अनुसान्धान भइरहेको प्रहरीले जनाएको छ । आक्रमण गरी हत्या गर्ने समूह भारतीय भएकोले पक्राउ गर्न समस्या भए पनि भारतीय प्रहरीको सहयोगमा उनीहरुलाई पक्राउ गरिने इलाका प्रहरी कार्यालय रानीका प्रहरी प्रमुख निरौलाको भनाइ छ ।
