बिराटनगर । पिताजी कृष्णप्रसाद कोइराला स्मृति परिषद विराटनगरको आयोजनामा प्रजातान्त्रिक योद्धा चक्रप्रसाद बाँस्तोलालाई पुरस्कृत तथा सम्मान गरिएको छ ।
आफ्नो जीवनमा प्रजातान्त्रिक आन्दोलनमा होमिएका र विभिन्न पदमा रहेर देश सेवा गरे बापत संस्थाले बाँस्तोलालाई ५० हजार रुपैयाँ राशीसहित शनिबार विराटनगरमा सम्मान गरेको हो ।
प्रदेश नं. १ का प्रमुख प्रा.डा.गोबिन्द तुम्बाहाङ्ले सम्मान गर्नुभएको थियो । सम्मान प्रदान गर्दै उहाँले पिताजी कृष्णप्रसाद कोइराला र चक्र प्रसाद बाँस्तोलाको योगदानको चर्चा गर्नुभयो ।
कार्यक्रममा प्राज्ञ दधिराज सुवेदिले संस्था स्थापनाको इतिहास र पुरस्कृत ब्यक्तित्वको परिचय दिनुभएको थियो । प्रदेश सभाका सभासदहरु सुयर्माराज राई, शान्ता पौडेल, साबित्रा रेग्मी, बिन्दिया कार्की, बिराटनगर महानगरपालिकाकी उपमेयर इन्दिरा कार्की तथा डा.भेषप्रसाद धमलाले पिताजी कोइराला र बाँस्तोलाको योगदानको चर्चा गर्नुभयो ।
समारोहमा अर्धचेतनामा रहेका पुरस्कृत ब्यक्ति बाँस्तोलाकी धर्मपत्नी कुशुम बाँस्तोलाले पतिलाई प्रदान गरिएको सम्मान तथा पुरस्कर ग्रहण गर्दै नेपाली काँंग्रेस र चक्रप्रसादको अवस्था अहिले उस्तै भएको बताउनुभएको थियो । कार्यक्रममा पिताजी कृष्णप्रसाद्ले स्थापना गरेको आदर्श मा.बि. कक्षा ९ मा अध्ययनरत नेहा खातुन र सर्वहितैषी मा.बि. डंग्राहाको कक्षा ८ का बिष्णु चौधरीलाई जनही २ हजार रुपैयाँसहित प्रशंसापत्र प्रदान गरिएको जानकारी संस्थाका महासचिव दिनेशराज सुवेदीले दिनुभएको छ ।
