विराटनगर । मोरङको दुई स्थानमा भएको आगलागीमा ५६ लाख ४५ हजार रुपैयाँ बराबरको धनमाला क्षति भएको छ ।
ग्रामथान गाउँपालिका २ स्थित बतराईटोल र सुनवर्सी नगरपालिका ९ डाईनिया बजार स्थित बृजलाल साहको सुनचाँदी पसलमा शुक्रबार भएको आगलागीमा कुल ५६ लाख ४५ हजार रुपैया बराबरको धनमाल क्षति भएको हो ।
एक नम्बर प्रहरी प्रदेश कार्यालय बिराटनगरका अनुसार ग्रामथानमा नेपोल सरदारको घरबाट दिउँसो तीन बजेतिर अचानक आगलागी सुरु भएको थियो । आगलागीमा नेपोलको १ तले ३ वटा घर, छिमेकीहरु गोपाल सरदार, महाविर सरदार, खनिलाल सरदारको २ वटा घर, सन्तोषीया सरदारको २ वटा घर, ननुलाल सरदारको ३ वटा घर, रामप्रसाद सरदारको २ वटा घर र मुनी सरदारको घर तथा किराना पसल जलेको छ । आगलागीमा ५२ लाख रुपैयाँ बराबरको क्षति भएको प्रहरीले जनाएको छ ।
यसैगरि मोरङको सुनबर्सी नगरपालिका ९ डाईनिया बजार स्थित बृजलाल साहको सुनचाँदी पसलमा शुक्रबार साँझ भएको आगालागीबाट नगद ५० हजार रुपैयाँ, ३ तोला सुनको गहना र ३० तोला चाँदीसमेत जल्दा ४ लाख ४५ हजार बराबरको क्षति भएको छ । आगालागी पीडितहरु आफन्त र गाउँमा पाल टाँगेर बसिरहेका छन ।
पीडितहरुलाई स्थानीय तहका जनप्रतिनिधि र रेडक्रसले राहत बितरण गरेको प्रहरीले जनाएको छ ।
