विराटनगर । मोरङ र सुनसरीमा भएका छुट्टाछुट्टै तीन सवारी दुर्घटनाबाट ३ जनाको मृत्यु भएको छ । बुधबार राति दुहवी नगरपालिका–८ कोशी राजमार्गमा को ३१ प ९९७८ र को २५ प १०३० नम्बरको मोटरसाइकल एकापसमा ठोक्किँदा ९९७८ नम्बरको मोटरसाइकलमा सवार विराटनगर–४ का विक्रम विश्वासको मृत्यु भएको प्रहरीले जनाएको छ ।
दुर्घटनामा गम्भीर घाइते भएका विश्ववासको उपचारका क्रममा कोशी अञ्चल अस्पताल विराटनगरमा राति नै मृत्यु भएको हो । सोही दुर्घटनामा मोरङको बनिगामा–७ का समिर चौधरी र पथरी नगरपालिका–२ का सुवास राई घाइते भएका छन् । उनीह?को दुहवीस्थित जीवन ज्योति अस्पतालमा उपचार भइरहेको इलाका प्रहरी कार्यालय दुहवीले जनाएको छ ।
यस्तै, कोशी गाउँपालिका–४ जुद्धगञ्जमा पूर्वतर्फ आउँदै गरेको यूजे–१०–पीबी–१८५६ नम्बरको भारतीय लहरीले साइकललाई ठक्कर दिँदा कोशी गाउँपालिका–४ का १९ वर्षीय इन्दल खंगको घटनास्थलमै मृत्यु भएको छ । साइकलको पछाडि सवार १३ वर्षीय प्रेमलाल मेहेता गम्भीर भएका छन्। उनको विराट नर्सिङ होम विराटनगरमा उपचार भइरहेको छ ।
यसैगरी मोरङको पथरी–शनिश्चरे नगरपालिका–१ स्थित पूर्वपश्चिम राजमार्गमा बुबार राति पिकअप गाडीको ठक्करबाट पैदलयात्रीको मृत्यु भएको छ । पूर्वबाट पश्चिमतर्फ आउँदै गरेको को २ च ३२२ नम्बरको पिकअपको ठक्करबाट पैदलयात्री सोही ठाउँका ४० वर्षीय रमेश लिम्बूको मृत्यु भएको हो ।
पिकअपको ठक्करबाट गम्भीर घाइते भएका लिम्बूलाई उपचारका लागि स्थानीय पथरी अस्पताल लगिएकोमा अस्पतालमै मृत्यु भएको हो । ठक्कर दिने पिकअप र त्यसका चालकलाई नियन्त्रणमा लिइएको इलाका प्रहरी कार्यालय पथरीका प्रहरी निरीक्षक विजय श्रेष्ठले जानकारी दिनुभयो ।
