काठमाडौं । राष्ट्रियसभामा सरकारले मनोनयन गरेका तीन जना सांसदले सपथ लिएका छन् ।
अर्थमन्त्रीसमेत रहेका डा.युवराज खतिवडा, रामनारायण बिडारी र विमला पौडेल राईले जेष्ठ सदस्य तारादेवी भट्टसमक्ष आज सपथ लिएका हुन् ।
यसअघि सर्बोच्च अदालतको अन्तरिम आदेशको कारण उनीहरुको सपथ रोकिएको थियो । सपथ रोक्ने अन्तरिम आदेशलाई सर्बोच्चले खारेज गरेपछि उनीहरुलाई सपथ गराउने बाटो खुलेको हो ।
शेरबहादुर देउवा नेतृत्वको सरकारले राष्ट्रियसभामामा सिफारिस गरेको नाम थन्क्याएर नयाँ सरकारले गरेको सिफारिसलाई राष्ट्रपति विद्यादेवी भण्डारीले अनुमोदन गरेको भन्दै सर्वोच्चमा रिट परेको थियो । रिटको अन्तिम किनारा लाग्न भने बाँकी छ ।
संसदको सपथ लिएपनि उनीहरुले राष्ट्रपति चुनावमा भोट हाल्न पाउने छैनन् । मतदाताहरुको अन्तिम नामावली प्रकाशन भइसकेको छ, जसमा उनीहरु छैनन् । यद्यपि, संघीय संसद् सचिवालयले सपथ लिएको जानकारी गराए बाधा अड्काउ फुकाउमार्फत मतदाता नामावलीमा नाम समावेश गर्न सक्नेछ ।
