पाँचथर, २२ फागुन।अत्यधिक मादक पदार्थ सेवन गरेका पाँचथरको फिदिमका एक व्यक्तिले आफ्नै श्रीमतिको हत्या गरी जमिनमुनी पुरेको खुलासा भएको छ ।
फिदिम नगरपालिका–३, सिलौटीका ४२ वर्षीया गंगामाया सुनुवारलाई उनकै श्रीमान् ६१ वर्षीय डिकबहादुर सुनुवारले हत्या गरेर जमिनमुनि गाडेको अवस्थामा शव भेटिएको हो ।
गंगामाया १६ दिनदेखि बेपत्ता थिइन् । छिमेकीले आशंका गरी प्रहरीमा उजुरी दिएपछि उनका श्रीमान् डिकबहादुरलाई प्रहरीले पक्राउ गरेर केरकार गर्दा घटनाको रहश्य खुलेको जिल्ला प्रहरी कार्यालय पाँचथरले जनाएको छ ।
डिकबहादुरले प्रहरीसमक्ष गंगामायाको आफैंले हत्या गरी घटना लुकाउन घर नजिकैको आलुबारीमा खाल्डो खनी गाडेको बयान दिएका छन् । प्रहरीका अनुसार टेकबहादुरले गत फागुन ५ गते राति सामान्य घरायसी विवादको क्रममा चिर्पट प्रहार गरी गंगामायाको हत्या गरेका थिए ।
डिकबहादुरले शव गाडेको ठाउँमा उत्खनन गर्दा टाउकोमा चोट लागेको अवस्थामा गंगामायाको शव भेटिएको जिल्ला प्रहरी कार्यालय, पाँचथरका प्रमुख प्रहरी नायब उपरीक्षक वामदेव गौतमले बताउनुभयो । अभियुक्तमाथि कर्तव्य ज्यान मुद्दाअन्तर्गत म्याद थप गरी अनुसन्धान भइरहेको पाँचथर प्रहरीले जनाएको छ ।
गंगामाया र टेकबहादुरबीच सामान्य झगडा भएको रातदेखि गंगामाया बेपत्ता भएको भन्दै छिमेकीले प्रहरीमा खबर गरेपछि प्रहरीले घटनाको अनुसन्धान थालेको थियो । उनीहरुको दुई छोरी र एक छोरा रहेका छन् ।