हिन्दुराष्ट्रको पक्षमा आन्दोलन चर्काउन आफैंमाथि गोली प्रहार गर्ने आचार्य श्रीनिवास पक्राउ परेको केही दिनपछि नेपाललाई हिन्दु राष्ट्र बनाउन चाहने भारतीय प्रधानमन्त्री नरेन्द्र मोदी नेपाल भ्रमणमा आउँदैछन् । एक हिसाबले नेपाल सरकारसँग परामर्श नगरी मोदी एक्लैले तय गरेको यो भ्रमणलाई नेपाल सरकारले धार्मिक र सांस्कृतिक भ्रमण भनेको छ ।
संविधानसभाबाट संविधान जारी भएपछि त्यसको विरोधमा नेपालमाथि नाकाबन्दी गरेर अमानवीय हर्कत गरेका मोदीको धार्मिक र सांस्कृतिक भ्रमणलाई नेपालको राष्ट्रवादी भनिएका केपी ओली ओली नेतृत्वको सरकारले दिएको महत्व भने उदेकलाग्दो छ । नेपालमाथि अमानवीय नाकाबन्दी थोपरेका मोदीलाई नागरिक अभिनन्दन गर्नेदेखि उनको स्वागतमा सडक बढार्ने काममा जनताका प्रतिनिधिहरु असिनपसिन भइ खटिरहेका छन् । नेपाली भूमिमा सुरक्षाको नाममा भारतीय सेना हतियारसहित उत्रिएका छन् । मोदीको आगमनमा नेपालको राज्य संयन्त्रले देखाइरहेको उत्साह चकित पार्ने खालको छ ।
नेपाली राष्ट्रवादी नेताहरूको मोदीप्रेम आम नेपालीहरूका लागि निःसन्देह चिन्ताको विषय हो । यो प्रकरणले नेपालका राष्ट्रवादी भनिएका नेताहरूका लागि राष्ट्रवाद, धर्मनिरपेक्षता र समाजवाद अन्तराष्ट्रिय र राष्ट्रिय बाजारहरूमा किनबेच गर्ने वस्तु मात्रै भएको बहस सुरु गरेको छ । मोदीलाई ठाउँ–ठाउँमा नागरिक सम्मान गर्ने र पूजाअर्चनाको नाममा पर्यटक र नेपालीहरुलाई हिँडडुलमै दुई दिनसम्म प्रतिबन्ध लगाउने कामा मोदीको नाकाबन्दीको डटेर सामना गरेका नेपालीहरुमाथिको अपमान हो । मोदीको नागरिक अभिनन्दनको तात्पर्य के हो सरकारले जवाफ दिन सकेको छैन । बरु आफ्नो राष्ट्रवादी छवीलाई लम्पसारवादमा लगेर विसर्जन गरेको छ । हिजो अरुण तेस्रोमा राष्ट्रवादको चर्को कुरा गर्नेहरुले नै अरुण भारतको जिम्मा लगाउँदैछन् । यसबाट नेपाली नेताहरुको राष्ट्रवादको कुरा पानीको फोका जस्तै बेमौसमी रहेको स्पष्ट बनेको छ ।
नेपालले सबै छिमेकीसँग समान र मित्रवत् व्यवहार गर्नुपर्छ । नेपाल लामो समयदेखि भारतको राजनीतिक, सांस्कृति र व्यापारिक दबाब र प्रभाबमा रहँदै आएको छ । संविधान जारी गरेपछि बनेको दुई तिहाई बहुमतको सरकारले त्यसबाट नेपाललाई मुक्त गर्ने नेपाली जनताको चाहना छ । तर, पछिल्लो समयमा सरकारले देखाएको भारतभक्ति र उत्तरी छिमेकी चिनसँगको सम्बन्ध विस्तारमा देखाएको उदासिनताले नेपाली जनता निरास बनेका छन् । जनताले गरेको विश्वास धर्मराउने खतरा बढेको छ । यसमा सरकार गम्भीर हुनुपर्छ । भुगोलमा मुलुक सानोठूलो भएपनि सार्वभौमसत्ता समान हुन्छ भन्ने प्रधानमन्त्री केपी ओली नेतृत्वको सरकार मोदीसामु लज्जास्पद रुपमा लम्पसार परेको नेपाली जनताले पचाउन सकेका छैनन् । यसबारे सरकार बोलोस् ।
