जाँते । हरियो वन नेपालको धन भन्ने उखान अहिले हरियो वन निमुखाको धन भएको छ । सामुदायिक वनहरुले वन पैदावार बिक्रीबाट आएको आम्दानीले वन विकासका साथै सामाजिक काम गरेर उदाहरणीय बन्दै आएका छन् ।
उत्तरी मोरङको लेटाङ–९ जाँतेको बसन्त हरियाली सामुदायिक वन उपभोक्ता समूहले पनि यस्तै अनुकरणीय कार्य गरेको छ । उक्त समूहले उपभोक्ताको मृत्युमा निःशुल्क दाउरा उपलब्ध गराउँदै आएको छ । यस्तै समूहले वडा कार्यालयको सहकार्यमा शव दहन स्थल, दाउरा सुरक्षित रहने घर र मलामी विश्रामालय निर्माण गरी दुःखमा सहयोगी बनेको छ । टहरा निर्माणमा समूहका तर्फबाट करिव ३ लाख रुपैयाँ लगानी भएको अध्यक्ष होमनाथ सुबेदीले जानकारी दिए । ‘मलामिहरुलाई घाम, पानीबाट जोगिनको लागि मलामि बस्ने घर, टहरा निर्माण गरिएको हो’– अध्यक्ष सुबेदीले भने । उनका अनुसार समूहले विपन्न उपभोक्ताहरुलाई घर निर्माणका लागि निःशुल्क एवं सहुलियत मुल्यमा चिरान काठ उपलब्ध गराउँदै आएको छ । समूहले वैकल्पिक आम्दानीका लागि खाली रहेको वन क्षेत्रमा सुपाडी, रुद्राक्षलगायतका नगदे वाली र फलफुलका विरुवा लगाएको छ ।
