केशव निरौला
पथरी । पूर्वोत्तर मोरङको पथरीशनिश्चरे १ मा रहेको पञ्चायत माध्यमिक विद्यालयले यसै वर्षदेखि कक्षा ११ मा आमसञ्चार र पत्रकारिता विषय पढाइ सुरु गर्ने भएको छ । शैक्षिक सत्र २०७८ देखि नयाँ विषयको रूपमा आमसञ्चार र पत्रकारिता पढाउने गरी भर्ना आह्वान गरिएको विद्यालयका प्रधानाध्यापक अर्जुनकुमार बुढाथोकीले जानकारी दिनुभयो ।
बर्सेनि नयाँ विषय समूह थप गर्दै आएको यस विद्यालयले गत वर्ष ललितकला (मूर्तिकला, चित्रकला आदि) र त्यसअघि कानुन समूहका विषय थप गरी नियमित पठनपाठन गर्दै आएको छ । यो वर्ष भने व्यावहारिक विषयको रूपमा ऐच्छिक चौथो समूहमा पर्ने कोड नम्बर ४४११ को आमसञ्चार र पत्रकारिता विषय पढाउने निधो गरिएको विद्यालय व्यवस्थापन समितिकी अध्यक्ष आइतकुमारी तुम्बापोले बताउनुभयो ।
पूर्वी मोरङमा क्रियाशील पत्रकार र अन्य नवप्रवेशीका लागि लक्षित गरी यस विद्यालयले कक्षा ११ र १२ मा आमसञ्चार र पत्रकारिता विषय पढाउने व्यवस्था मिलाएको बताउनुहुन्छ प्रअ बुढाथोकी ।
पञ्चायत माविमा अहिले विज्ञान, सिभिल इन्जिनियरिङ, कानुन, ललितकला, व्यवस्थापन, शिक्षा र मानविकी समूहका विषय पढाइ भइरहेकामा आमसञ्चार र पत्रकारिता भने मानविकी तथा शिक्षा समूहमा पढाउने व्यवस्था मिलाइएको छ ।
योसँगै विराटनगरबाहिर पहिलोपटक व्यावहारिक एवम् व्यावसायिक स्तरमा समयसान्दर्भिक ठानिएको आमसञ्चार र पत्रकारिता शिक्षाको पठनपाठन पनि पथरीशनिश्चरे नगरबाटै सुरु हुँदै छ । स्मरणीय छ, नेपाल पत्रकार महासङ्घ मोरङले समेत भर्खरै मात्र आमसञ्चार र पत्रकारिता विषयको पठनपाठन गराउन आवश्यक पहल होस् भनी यस विद्यालयमा ज्ञापनपत्र बुझाएको थियो ।
