पथरी शनिश्चरे । १८ औं राष्ट्रिय धान दिवश तथा रोपाईं महोत्सवका अवसरमा आज मोरङको पथरी शनिश्चरे नगर उपप्रमुख यमुना विष्ट वास्तोला सहित ३ जना सम्मानित भएका छन् ।
वडा नम्बर ६ को भातेगौंडास्थित कुटो कोदाली कृषि सहकारी संस्थाको आयोजनामा सम्पन्न कार्यक्रममा जिल्लामा मात्र नभएर १ नम्बर प्रदेशमै सवैभन्दा बढी संख्यामा विवादहरु निरुपण गरेकोमा नगर उपप्रमुख वास्तोलालाई सम्मानपत्रले सम्मानित गरिएको हो । त्यस्तै, कृषि तथा पशुपंक्षीको क्षेत्रमा कृषकलाई प्रोत्साहित गर्दै कार्यक्रम तय गर्न महत्वपूर्ण भूमिका निर्वाह गर्ने नगरको पशुपंक्षी शाखा प्रमुख हेमचन्द्र दहाल र कृषि शाखा प्रमुख सावित्रा कार्कीलाई पनि सम्मानपत्रले सम्मानित गरिएको छ ।
नगर प्रमुख दिलीपकुमार राई, प्रमुख प्रशासकीय अधिकृत लक्ष्मीप्रसाद खरेल, वडाध्यक्ष, कार्यपालिका सदस्य तथा वडा सदस्यहरु सहभागि भई धान रोप्ने कार्यक्रममा सहभागि वन्नु भयो । कार्यक्रममा बोल्दै नगर प्रमुख राईले कृषिप्रधान नगरमा कृषि क्षेत्रको विकासमा नगरले थप प्रगति गर्न बाँकी रहेको उल्लेख गर्दै प्रगतिको प्रयास भइरहेको जनाउनु भयो । नगरपालिकाको सहयोगमा ‘धान उत्पादनमा बृद्धि, खाद्य सुरक्षा, आत्मनिर्भरता र समृद्धि’ भन्ने नाराकासाथ पञ्चेवाजा बजाएर नाचगान गर्दै दहीचिउरा खाएर दिवशलाई हर्षाेल्लासपूर्वक मनाइएको थियो । त्यहाँ यशोदा पाण्डेको १६ कठ्ठा जग्गामा रोपाईं गरिएको थियो ।
त्यसैगरी, पथरी कृषि सहकारी संस्थाका आयोजनामा वडा नम्बर ६ मै कृष्ण आचार्यको खेतमा भएको सामुहिक रोपाईंमा पनि नगर प्रमुख, उपप्रमुख सहितको सहभागिता रहको थियो ।
