मोरङ । गम्भीर प्रकृतिका कोरोना संक्रमितको उपचार गर्दै आएको विराटनगरस्थित कोशी कोभिड १९ उपचार केन्द्रले संक्रमित विरामीहरुका लागि मनोपरामर्श सेवासमेत सुचारु गरेको छ ।संक्रमित भएपछि कतिपय विरामीहरुमा मानसिक समस्या पनि देखा पर्न थालेकाले अस्पतालले मनोपरामर्श सेवा सुरु गरेको हो ।
प्रदेश सरकारको सहयोगमा सञ्चालित विराटनगरस्थित कोशी कोभिड १९ उपचार केन्द्रले गम्भीर अवस्थाका संक्रमितको उपचार गर्दै आएको छ । दोस्रो चरणको कोभिड भेरियन्टमा संक्रमित हुनेको संख्या र संक्रमणबाट मृत्यु हुनेको संख्यामा बृद्धि भएको कारण संक्रमितहरु मानसिक रुपमा डराउने गरेकाले अस्पतालले मनोपरामर्श सेवा सुरु गरेको अस्पतालका व्यवस्थापक संयोजक बैजनाथ साहले बताए ।
खासगरी संक्रमित विरामीहरु डराउनाले थप समस्याहरु देखा परेकाले अस्पतालले कोसिस मनोपरामर्श नामक संस्थासँग सहकार्य गरेर विरामीहरुलाई मनोपरामर्श दिन थालेको हो । मनोपरामर्श सेवा सुरु गरेपछि भेन्टिरटरमा राख्नुपर्ने अवस्थामा पुगेका विरामीहरुमा पनि सुधार आउन थालेको साहले बताए ।
अस्पतालले विरामीका आफन्तहरुलाई पनि मनोपरामर्शका साथै विरामीको स्वास्थ्य अवस्थाका बारेमा जानकारी गराउने गरेको जनाएको छ । अस्पतालले आफ्ना विरामीहरुलाई मनोपरामर्श दिन थालेपछि केहि राहत महसुस गरेको विरामीका आफन्त सुनसरीको इटहरीका सुवास धितालले बताए ।प्रदेश १ सरकार मातहत सञ्चालित आइसियु, भेन्टिलेटर र अक्सिजनलगायत सुविधासहितका ९६ वटा बेड रहेको अस्पतालमा सबै बेडमा संक्रमित विरामी उपचाररत छन् ।
