मोरङको कानेपोखरी–२, स्थित शिक्षा विकास माबिमा एक दिने पत्रकार सम्बन्धी अभिमुखीकरण कार्यक्रम सम्पन्न भएको छ । वडा नं २ को सहयोग र कानेपोखरी मिडिया प्रा.लिको आयोजनामा गत शनिबार सोही विद्यालयमा अध्ययनरत कक्षा १२ का छात्रछात्रालाई अभिमुखीकरण गरिएको हो । कक्षा १२ का ३५ जना छात्रछात्रा कार्यक्रममा सहभागी भएका थिए ।
पत्रकार आचारसंहिता, छापा, रेडियो र अनलाइन पत्रकारीता, पत्रकार र उद्घोषण कला सम्बन्धी अभिमुखीकरण गरिएको थियो । कार्यक्रमलाई पत्रकार अर्जुन जम्मेली राई, केशव निरौला र मोहन भट्टराईले सहजिकरण गरेका थिए । कार्यक्रमका प्रमुख अतिथि वडा नं २ का सुशिल बुढाथोकीले विद्यार्थीहरुले आधारभूत कुराहरुको ज्ञान लिनु पर्ने आवश्यक भएकोले यस्तो कार्यक्रम विद्यालयमा आयोजना गरेको बताए । यहाँ अध्ययनरत विद्यार्थीहरुको पढाई मात्र नभएर विभिन्न क्षेत्रमा क्षमता बृद्धि गर्न वडा कार्यालय लागि परेको उनले बताए ।
कार्यक्रममा विद्यालयको प्रधानाध्यपक रुद्र निरौला र विद्यालय व्यवस्थापन समितिका अध्यक्ष गोपाल कार्कीले सम्बोधन गरेका थिए । त्यसैगरी सहभागीको तर्फबाट सिर्जना कार्की र दुर्गा प्रसाद खतिवडाले कार्यक्रमको बारेमा आफ्नो भनाई राखेका थिए । कानेपोखरी मिडिया प्रा.लि.का संचालक सदस्य अशोक फुयलको सभापतीत्वमा भएको थियो ।
