नगरमा जनताको सुरक्षित आवास कार्यक्रम सञ्चालनको तयारी

पथरी शनिश्चरे । मोरङको पथरी शनिश्चरे नगरमा विपन्न नगरवासीका लागि जनताको सुरक्षित आवास कार्यक्रम सञ्चालनको तयारी भएको छ । नगर प्रमुख दिलीपकुमार राईको अध्यक्षताको कार्यपालिका बैठकले संघीय सरकारको खरको छाना हटाउने अभियान अन्तर्गतको कार्यक्रमको तयारीका सम्बन्धमा छलफल गरेको नगर प्रवक्ता यामप्रसाद गुरागाईंले जनाउनु भयो । सो कार्यक्रममा पहिलो किस्ताका रुपमा ६३ लाख ९३ हजार रुपैयाँ विनियोजित भएकाले सम्बन्धित लाभग्राहीसँग सम्झौता गर्ने प्रक्रिया अघि बढाउन आज वडा कार्यालयका सचिव तथा प्राविधिक कर्मचारीहरुलाई अभिमुखिकरण गरिएको छ । सुरक्षित आवास अन्तर्गत नगरमा २ करोड ३५ लाखको बजेटमा ४ सय ७१ घरलाई टिनको छानो लगाउने कार्यक्रम रहेको छ । बैठकले आगामी आर्थिक वर्षका लागि संघीय सरकारसमक्ष नगरका मुख्य ३ वटा आयोजना माग गर्ने निर्णय सहितका निर्णय गरेको छ ।