पथरी शनिश्चरे । मोरङको पथरी शनिश्चरे नगर उपप्रमुख यमुना विष्ट वास्तोलाले नगर क्षेत्रमा रहेका भूटानी शरणार्थीहरुका लागि मानवीय सेवाका हिसावले विभिन्न कार्यक्रमहरु सहकार्य गरेर अघि बढ्दै जाने बताइन् ।
उनले आज वडा नम्बर १० स्थित भूटानी शरणार्थी शिविरमा युएनएचसीआरको सहयोग र नेपाल सरकारको समन्वयमा लुथरन विश्व फेडेरेशनले सञ्चालन गरेको ‘लैंगिक विभेदमा आधारित यौनजन्य हिंसाबाट हुने घटनाको नियन्त्रण र समाधान विषयक क्षमता अभिबृद्धि तालिम’मा बोल्दै सो कुरा बताकी हुन् ।
कार्यक्रममा उनले विशेषगरी महिला, बालबालिका, ज्येष्ठ नागरिक, अपाङ्गता भएका व्यक्तिहरुका लागि शिपमुलक कार्यक्रम, स्वास्थ्य, शिक्षा, न्याय सम्पादन सहितका मानवीय हिसावले पुर्याउन मिल्ने सहयोगका लागि समन्वयात्मक कार्यक्रम अघि बढाउँदै आएको र थप अघि बढाउँदै जाने प्रष्ट्याइन् ।
कार्यक्रममा, नगरका कानूनी सल्लाहकार दीपक कुमार राई र महिला तथा बालबालिका शाखा प्रमुख गीता कट्टेलले महिला मञ्च, बाल मञ्च र अपाङ्गता मञ्चका सहभागिका लागि लैंगिक विभेदमा आधारित यौनजन्य हिंसाबाट हुने घटनाको नियन्त्रण र समाधानका बारेमा सहजिकरण गरे । लुथरनका लील कार्कीले कार्यक्रमको औचित्य प्रष्ट्याएका थिए ।
