उदयपुर । चौदण्डीगढी नगरपालिका–५ सिवाईमा बिहीबार साँझ आगलागीमा करिब ३५ लाख रुपैयाँको क्षति भएको छ। आगलागीबाट दुई घर जलेर पूर्णरुपमा नष्ट भएको छ। भोलु चौधरीको घरबाट सल्केको आगोले उनका छिमेकी रामेश्वर चौधरीको घर जलेर नष्ट भएको हो। आगलागीबाट काठ, टाटिको बेरा र जस्तापाताको छानो भएको भोलुको दुई तल्ले घर, अन्नपात, भाँडा वर्तन, लत्ताकपडा, गरगहना, सुन चाँदी र नगद जलेको जिल्ला प्रहरी कार्यालय उदयपुरका सूचना अधिकारी तथा डिएसपी बेदप्रसाद गौतमले जानकारी दिए।
रामेश्वरको घरको काठ, टाटीको बेरा र जस्तापाताको छानो भएको दुई तल्ले घर जलेको डिएसपी गौतमले जानकारी दिए। नेपाल प्रहरी, स्थानीय र चौदण्डीगढी नगरपालिका र सप्तरीको कन्चनरुप नगरपालिकाको दमकलले करिब एक घण्टापछि आगो नियन्त्रणमा लिएको थियो। (थाहखवर)
