कानेपोखरी । मोरङको कानेपोखरीस्थित ग्रामिण सुधार सामुदायिक वन उपभोक्ता समूहको २०औं वार्षिक साधारणसभा सम्पन्न भएको छ । शुक्रबार आइतबारेमा विविध कार्यक्रम गरी साधारणसभा सम्पन्न भएको हो ।
साधारणसभाको उद्घाटन कानेपोखरी गाउँपालिका अध्यक्ष ताराबहादुर काफ्लेले ब्यानर खोलेर र विरुवामा पानी हालेर गरेका थिए । कार्यक्रममा कानेपोखरी ७ का वडाध्यक्ष मोहन अधिकारीले शुभकामना मन्तव्य राख्दै सामुदायिक वनले पर्यापर्यटनलाई प्रबद्र्धन गर्न सुझाव दिएका थिए ।
समूहकी सचिव शान्ता माझीले सञ्चालन गरेको कार्यक्रममा अध्यक्ष नविन राईले वार्षिक कार्यप्रगति प्रतिवेदन र कोषाध्यक्ष देवेन्द्र थापाले आर्थिक प्रतिवेदन प्रस्तुत गरेका थिए । उपाध्यक्ष विष्णु रोक्काले स्वागत गरेका थिए ।
प्रगति प्रतिवेदन प्रस्तुत गर्दै अध्यक्ष राईले समूहलाई सञ्चालन गर्ने क्रममा विभिन्न समस्याहरु, बाधा अवरोध सृजना भएकोले आ.व. २०७४÷०७५ संकलन गरेको वन पैदावर उपभोक्ता माझ विक्री वितरण गर्न नसकेको जानकारी दिए । अध्यक्ष राईका अनुसार समूहको मुख्य आम्दानीको श्रोत वन पैदावर विक्री वितरण गर्न नपाउँदा वन संरक्षण, वन विकास, कार्यालय सञ्चालन, सामाजिक विकास र कर्मचारीको तलब भत्ता, १९औं साधारणसभाको खर्चसमेत भुक्तानी गर्न बाँकी रहेको छ । समूह सञ्चालनका लागि ऋण सापटी लिएको अध्यक्ष राईले बताए ।
