कानेपोखरी । कानेपोखरी–०६, दहिधापमा स्थापित नव दिप फुटबल क्लबले बडादशै, शुभदिपावली र छठपर्वको पावन अवसरमा आयोजना गरेको नव दिप नकआउट फुटबल प्रतियोगिता अन्तर्गत आइतबार भएको फाइनल खेलमा पौडेल चोक फुटबल क्लब कानेपोखरी ६ बिजयी भएको छ ।
फाइनल खेल हाइवे युथ फुटबल क्लब पथरी शनिश्चरे १ र पौडेल चोक फुटबल क्लब कानेपोखरी ६ बीच दहिधाप डाँडाको खेल मैदानमा भएको थियो । सो प्रतिस्पर्धामा पौडेल चोक फुटबल क्लब १–० गोल अन्तरले विजयी भएको थियो । निर्धारित ३०–३० मिनेटको खेलको पहिलो हाफ १५ औ मिनेटमा पौडेल चोकका लागि अनिल तिम्सिनाले उत्कृष्ट गोल गर्दै अग्रता दिलाएका थिए। सोही गोल जितको निर्णायक गोल बन्यो । दुवै टिमबाट उत्कृष्ट गोलका प्रयास भएपनि दुवै टिमले गोल गर्न भने सकेन् ।
विजेता टिम पौडेल चोकलाई नगद १३ हजार र उपविजेतालाई ८ हजार रुपैयाँ सहित ट्रफी, मेडलसहित प्रमाणपत्र प्रदान गरिएको छ । म्यान अफ दि म्याच पौडेल चोकका अनिल तिम्सिना घोषित भए भने बेस्ट प्लेयरको उपाधी हाइवेका असिम राईले प्राप्त गरे । साथै, पौडेल चोकको तर्फबाट पहिलो गोल गर्ने खेलाडी अनिल तिम्सिनालाई हौसला स्वरुप नेपाली काङ्ग्रेस कानेपोखरी ६ सभापति नेत्र थापाले नगद ५ सय रुपैयाँ प्रदान गरे । आयोजक क्लबका अध्यक्ष मानकुमार माझी, प्रमुख अतिथी समाजसेवी देवेन्द्र लुइँटेल, बिशिष्ट अतिथीहरु नेपाली काङ्ग्रेस महासमिति संयोजक जयराज संयोक, ग्रामीण सुधार सामुदायिक वन कानेपोखरी क्षेत्र नम्बर ३ का संयोजक शेरबहादुर लिम्बूलगायतले विजेता र उपविजेता टिमलाई खदा, अबिर प्रमाणपत्रसहित बधाई दिएका थिए ।
समापन समारोहमा खेलपे्रमी, समाजसेवीहरु सन्तोष फुयल, सुशील राई, भुपेन्द्र सिवाकोटी, शंकर लिम्बू, इन्द्रमाया राई, पुर्ण बोहोरा, डिन्डर खड्कालगायतको विशेष उपस्थिति रहेको थियो । यो प्रतियोगिता असोज ३० गतेदेखी कार्तिक ९ गतेसम्म सञ्चालन भएको हो।
