काठमाडौं । च्याम्पियन्स लिग फुटबलको क्वार्टरफाईनलमा जर्मन क्लब बायर्न म्युनिखसँग ८–२ को लज्जास्पद हार भोगेपछि स्पेनी क्लब बार्सिलोनाले टोलीका मुख्य प्रशिक्षक क्वीक सेटिनलाई बर्खास्त गर्ने भएको छ । बार्साका अध्यक्ष जोसेप मारिया बार्टोमेउले मुख्य प्रशिक्षक सेटिनलाई यसै साता जिम्मेवारी मुक्त गर्ने बताएका हुन् ।
त्यसबारे औपचारिक निर्णय आज बस्ने बैठकबाट हुने स्पेनी मिडियाले उल्लेख गरेका छन् । बार्साले नयाँ प्रशिक्षकका रुपमा रोनाल्ड कोम्यानलाई ल्याउने भएको छ । नेदरल्याण्डस्का प्रशिक्षक कोम्यानलाई सेटिनको स्थान दिने बार्साको तयारी छ । ६१ बर्षीय सेटिनको नेतृत्वमा बार्सिलोनाको प्रर्दशन खस्कदै गएपछि क्लवले उनको विकल्प खोजेको हो ।
बार्सा यो सिजनको ला लिगामा दोस्रो स्थानमा रहेको थियो । गत जनवरीमा अर्नेष्टो भल्भर्डेको स्थानमा बार्सा पुगेका सेटिनले यो सिजन बार्सालाई कुनै पनि उपाधि दिलाउन सकेनन् ।
