झापा । झापाको कमल गाँउपालिका वडा नम्बर ५ को कार्यालय भवन शिलान्यास गरिएको छ । पाडाजुंगी चौक पूर्व पाथीभरा चौकमा निर्माण हुने वडा कार्यालय भवनको आज एक कार्यक्रमका बीच शिलान्यास गरिएको वडाध्यक्ष डम्बरवहादुर निरौलाले वताएका छन् ।
भवनको प्रदेश सभा सदस्य अर्जुन राईले बैद्धिक विधि अनुसार शिलान्यास गरेका हुन् । उपभोक्ता समितिमार्फत रु २५ लाखको वजेटबाट यसवर्ष भवन निर्माणको काम शुरु गरिने वडाध्यक्ष निरौलाले जानकारी दिए । प्रदेश सभा सदस्य अर्जुन राईको सांसद विकास कोषमार्फत विनीयोजित रु २५ लाखको वजेटबाट भवनको प्रारम्भिक चरणका काम शुरु गरिने उनले वताए ।
शिलान्यास कार्यक्रममा प्रमुख अतिथि प्रदेश सभा सदस्य राई, गाँउपालिकाकी अध्यक्ष मेनुका काफ्ले, उपाध्यक्ष बेणु शिवाकोटी लगायतले वोलेका थिए । सो अवसरमा भवन निर्माणका लागि जग्गादान गर्ने सन्तोष कार्कीका परिवारलाई सम्मान समेत गरिएको थियो । दाताले त्यहाँ करिव ३० लाख मूल्य पर्ने १७ धुर जग्गा उपलव्ध गराएका थिए । कार्यक्रममा गाँउपालिकाका प्रमुख प्रशासकीय अधिकृत सुवास श्रेष्ठ,कमल गा.पा ७ का वडाध्यक्ष पृथ्वीपति राई, साविक लखनपुर गाविसका पूर्व अध्यक्ष भोजुकमार घिमीरे, सामाजिक अगुवा दिलीप वान्तवा लगायतको उपस्थिति रहेको थियो ।
भवन बनाउन बलराम गजुरेलको अध्यक्षतामा उपभोक्ता समिति गठन गर्नुका साथै जग्गादाता सन्तोष कार्कीको संयोजकत्वमा पाँच सदस्यीय एक अनुगमन समिति समेत गठन गरिएको थियो ।
