काठमाडौं । स्वास्थ्य तथा जनसंख्या मन्त्रालयले आज बुधबार थप तीनजनामा कोरोना संक्रमण भएको पुष्टि गरेको छ । नियमित पत्रकार सम्मेलनमा बुधबार मन्त्रालयका प्रवक्ता डा. विकास देवकोटाले बाराका दुईजना र पर्साका एकजनामा कोरोनाभाइरस संक्रमण भएको र उनीहरुको नारायणी अस्पतालमा उपचार भइरहेको जानकारी दिए ।
उनीहरु तबलिगी जमात नामक मुस्लिम समूहको दिल्लीमा भएको सभामा सहभागी भएको पनि मन्त्रालयले जनाएको छ । योसँगै नेपालमा कोरोना संक्रमित ५७ जना पुगेका छन् भने १६ जना निको भइसकेका छन् । बिरामीहरु सबैको अवस्था सामान्य रहेको पनि मन्त्रालयले जनाएको छ । डा. देवकोटाले विदेशबाट आएकाहरुमा अझैपनि संक्रमणको जोखिम रहेको भन्दै अरुलाई रोग सर्न नदिनका लागि घरमै बस्न र स्वास्थ्य जाँच गराउन आग्रह गरे ।
बुधबारसम्म ‘पीसीआर’बाट ११ हजार ५२४ ओटा तथा ‘आरडीटी’बाट ४५ हजार ६६५ गरी ५७ हजार १८९ ओटा परीक्षण परीक्षण भएका छन् । पछिल्लो २४ घन्टाको अवधिमा दुई हजार ३६७ ओटा नमुना परीक्षण भएका छन् । मन्त्रालयले हाल २२ हजार ९०१ जना ‘क्वारेन्टाइन’मा रहेको र उपत्यकामा चारसहित ८७ जना ‘आइसोलेसन’मा रहेको जनाएको छ । यस्तै, मन्त्रालयले आयुर्वे्दिक चिकित्सासम्बन्धी निर्दे्शिका पनि जारी गरेको छ ।
