सुनसरी । नेपाल–भारत सीमा सिल र देशभर लकडाउन भएका बेला धरान आएका एक भारतीय नागरिकलाई क्वारेन्टाइनमा राखिएको छ । तीन दिनअघि धरान आएर लुकेर बसेको थाहा पाएपछि स्थानीयहरू सशंकित बनेका थिए । धरान–१५, बाँझोगरस्थित सदन रोडमा तरकारी व्यापार गर्ने बद्री चौधरीको घरमा आएका उनी लुकेर बसेको थाहा पाएपछि स्थानीयले प्रहरीलाई खबर गरेका थिए । प्रहरीलाई खबर गर्नासाथ ती व्यक्ति भाग्न खोजेका थिए ।
लकडाउन र सीमा सिल भएका बेला ती भारतीय नागरिक कसरी धरान आइपुगे भन्ने खोजी भइरहेको प्रहरीले जनाएको छ । स्थानीयले भने चौधरीको तरकारी बोक्ने मिनीट्रकमा लुकेर आएको हुन सक्ने आशंका गरेका छन् । ती भारतीय नागरिकलाई फुस्रेस्थित नेपाली सेनाले बनाएको क्वारन्टाइनमा राखिएको प्रहरीले जनाएको छ । ती व्यक्तिको रिपोर्ट पोजेटिभ देखिए उनी बसेको घरका सबैलाई क्वारेन्टाइनमा राखिनेछ ।
