शनिश्चरे । कोरोना भाइरसको संक्रमण रोक्न गरिएको बन्द (लकडाउन) का कारण बढी समस्यामा परेका दैनिक ज्यालामजदुरी गर्नेका लागि मोरङको पथरी शनिश्चरे ७ मा आज (सोमबार) खाद्यान्न राहत वितरण गरिएको छ ।
स्वास्थ्य सतर्कताका साथ दुरी कायम गरेर सवैलाई साबुनपानीले हात धुन लगाएर सेनिटाइजरको प्रयोग गरी ‘कोरोना भाइरस जोखिम न्यूनिकरण नगरस्तरीय समन्वय समिति’, राहत व्यवस्थापन तथा वितरण समिति र वडास्तरीय समिति मार्फत राहत वितरण गरिएको हो ।
वडा नम्बर ७ मा १ सय ४७ जनालाई राहत वितरण गरिएको समितिले जनाएको छ । वडाध्यक्ष कपिलमणि ढकालको अगुवाईमा वडा सदस्यहरु, वडाका कर्मचारी, वडा स्तरीय राहत व्यवस्थापन एवं वितरण समिति, सुरक्षाकर्मी, स्वयंसेवक र राजनीतिक दलको उपस्थितिमा वडाका तीन स्थानमा राहत वितरण गरिएको हो ।
जसमा लामाटोलस्थित दुर्गा मावि, किरातचोकस्थित चन्द्रकिरातेश्वर मावि र किर्तिपुरस्थित बालकल्याण माविमा राहत वितरण गरिएको हो ।
२ जनासम्मको परिवारलाई प्रति परिवार १२ केजी चामल, २ भन्दा माथिको सदस्य रहेका परिवारलाई २५ केजी चामल तथा सवैका लागि प्रति परिवार २ केजी दाल, १ केजी नून, १ लिटर खानेतेल र २ वटा साबुन राहतका रुपमा वितरण भएको छ ।
कोरोना भाइरस जोखिम न्यूनिकरण नगरस्तरीय समन्वय समितिका संयोजक नगर प्रमुख दिलीपकुमार राई, राहत व्यवस्थापन तथा वितरण समिति संयोजक नगर उपप्रमुख यमुना विष्ट वास्तोलाको अगुवाईमा राहत वितरण भएको छ ।
