भिमराज अधिकारी । पथरीशनिश्चरे । नगरभरी नै एउटा पनि क्वारेनटाइन नभएको अवस्थामा वडा अध्यक्षले आफ्नै लगानीमा १० बेडको क्वारेनटाइन बनाएर नगर प्रमुखलाई हस्तान्तरण गरेका छन् । मोरङको सुनवार्षी नगरपालिकाले बनाउने तयारी गरेको भएपनि हाल सम्म क्वारेनटाइन बनाउन सकेको थिएन । वडा नं. २ अमरदहका अध्यक्ष प्रताप तामाङले करिब ३ लाख बराबरको सामान खरिद गरी क्वारेनटाइन निर्माण गरेका हुन् ।
जम्मा १० वटा बेड, त्यहाँ विरामी बस्दा आवश्यक पर्ने अन्य सम्पूर्ण सामाग्री गरेर जम्मा २ लाख ९३ हजार ४२० रुपैया खर्च भएको अध्यक्ष तामाङले बताए । ‘‘क्वारेनटाइन भएता पनि बेडहरु आइसोलेसनमा प्रयोग हुने गरिको छ । नगरले बनाउने भनेको विवाद मात्रै भइरहन्छ मैले आफैले मेरो सुविधा वापत आउने रकमबाट खर्च गरेर क्वारेनटाइन बनाएको हुँ ।’’ तामाङले भने ।
अमरदह स्वास्थ्यचौकीमा निर्माण गरिएको सो क्वारेनटाइन सोमबार नगर प्रमुख काली प्रसाद दासलाई हस्तान्तरण गरिएको हो । प्रमुख दासले वडाले नगरलाई ठुलो गुन लगाएको भन्दै क्वारेनटाइनमा आवश्यक पर्ने अपुग सामानहरुको व्यवस्थापन गरी स्वास्थ्यकर्मीहरु खटाउने बताउनुभयो । सो क्वारेनटाइन सुनवार्षीको एकमात्र क्वारेनटाइन हो । छिमेकी मुल भारतसंग सिमाना जोडिएको हुँदा सुनवर्षी अझै वढि जोखिममा रहेको छ ।
वडामा यसअघि पनि ९० हजार बराबरको मास्क, साबुन, स्यानिटाइजर, ग्लोव्स लगाएतका सामाग्री वितरण गरिसकिएको तामाङले बताए । अब अतिविपन्न परिवारका लागि खाद्यान्न वितरण गर्नका लागि १ लाख ४५ हजार बराबरको दाल चामल खरिद गरिसकेको तामाङले बताए । अब वडामा अतिविपन्न परिवारको लगत सङ्कलन गर्ने र सो पछि राहत सामग्री वितरण गरिने तामाङले बताएका छन् ।
