भोजपुर । विश्व अल्ट्रा धाविका मिरा राईको नाममा भोजपुरमा निर्माणाधीन मिरा राई रंगशालाको कामले अपेक्षाकृत गति लिँदै गएको छ ।अन्तर्रा्ष्ट्रिय मापदण्डको रंगशाला निर्माण भएपछि यस क्षेत्रमा खेलकूदका साथै पर्यटन विकासले समेत फड्को मार्ने अपेक्षा गरिएको छ ।
जिल्लाभित्रै दक्ष खेलाडी उत्पादन गर्ने उद्देश्यले विश्व अल्ट्रा धाविका मिरा राईको नामबाट भोजपुरको पौवादुङमा गाउँपालिकाद्वारा सुरु गरिएको मिरा राई रंगशालाको निर्माण कार्यले तीव्रता पाइरहेको छ ।मैदान अभावमा युवापुस्ता पलायन हुन थालेपछि गाउँपालिकाले रंगशाला निर्माणको योजना अघि सारेको हो ।
अहिले रंगशालाको कटिङ, फिलिङ, ग्राभेलिङको काम सम्पन्न भएको छ ।गाउँमै रंगशाला निर्माण हुने भएपछि खेलकूद क्षेत्रको विकासले फड्को मार्ने स्थानीय योगराज कटुवालको भनाइ छ ।अन्तर्रा्ष्ट्रिय मापदण्डअनुसार रंगशालाको लम्बाइ ९० मिटर र चौडाइ ४५ मिटरको हुने भएपछि खेलप्रेमी युवाहरु थप उत्साहित भएका छन् ।
भविष्यमा राष्ट्रियस्तरका ठूला प्रतियोगिता खेल्न सकिने भएपछि राम्रा खेलाडी उत्पादनमा सहयोग पुग्ने स्थानीय राजु विश्वकर्मा बताउँछन् ।करिब २६ रोपनी क्षेत्रफलमा निर्माणाधीन रंगशाला निर्माणका लागि गाउँपालिकाको क्रमागत योजनाअन्र्तगत ५५ लाख र प्रदेश सरकारको १ करोड ३५ लाख गरी करिब २ करोड बराबरको लागत लागिसकेको गाउँपालिकाले जनाएको छ ।
थप बजेटका लागि संघीय सरकार र अन्य दातृ निकायसँग पनि समन्वय भइरहेको छ । रंगशालाका लागि गाउँपालिकाले ५६ करोड रुपैंयाँको डीपीआर पनि तयार पारेको छ ।करिब चार वर्षको समयावधिमा बनिसक्ने रंगशालामा १२ हजारदेखि १४ हजार भिआईपी गेष्टसहितको प्यारापिटको खाका तयार पारिएका गाउँपालिका अध्यक्ष किरण राईको भनाइ छ । रंगशालामा विशेष गरी फुटबल, म्याराथुन, एथ्लेटिक्स, भलिबल खेल खेल्न मिल्ने डिजाईन रहेको गाउँपालिकाले जनाएको छ ।
