विराटनगर । अपहरणमा परेको नाटक गरेर आफ्नै बुबासँग फिरौती रकम लिने छोरालाई जिल्ला प्रहरी कार्यालय मोरङले पक्राउ गरी सार्वजनिक गरेको छ । २३ फागुनमा घरबाट निस्किएका बुढिगंगा गाउँपालिका–३ का २४ वर्षीय मुकेशकुमार महत्तोले सोही दिन आफ्नै बुबालाई अपहरणमा परेको भनी फोन गरेका थिए ।
घटना बारेका जानकारी पाएको जिल्ला प्रहरी कार्यालय मोरङको प्रहरी टोलीले खोजतलास गर्ने क्रममा २६ फागुनमा सुनसरीको भान्टावारीमा मुकेशकुमारलाई फेला पारेको थियो । उनी फेला परेसँगै अपहरण नभइ अपहरणको नाटक भएको खुल्न आएको हो ।
मुकेश पक्राउ परेसँगै फिरोतीको रकमसहित निजकै घरमा काम गर्ने २५ वर्षीय कृष्ण राजवंशीलाई समेत पक्राउ गरी आजै जिल्ला प्रहरी कार्यालय मोरङमा पत्रकार सम्मेलन गरी सार्वजनिक गरिएको हो । पक्राउ परेका दुवै जनाको सम्बन्धमा थप अनुसन्धान भइरहेको जिल्ला प्रहरी कार्यालय मोरङले जनाएको छ ।
