धरान । धरान ४ स्थित भेडेटारमा साहसिक खेल जिपलाइनको प्रदेश १ का मुख्यमन्त्री शेरधन राईले उद्घाटन गरेका छन् । भेडेटार देवीथान जिपलाइनको शनिबार उद्घाटन भएको हो । मुख्यमन्त्रीले उद्घाटन गरेको जिपलाइनमा धरानका उपप्रमुख मन्जु भण्डारीले प्रयोग गरिन् । धरानकी उपप्रमुख मञ्जु भण्डारी सुवेदीले गरेको उडान सुपरम्यान जिपलाइन थियो । धरान ४ तर्फको भेडेटारबाट सुरुवाती पोइन्टबाट देवीथानमा ल्याण्डिङ हुनेछ ।
यो जिपलाइनको लम्बाई ६ सय ५० मिटर र उचाई १५० मिटरसम्म छ भने पर्यटकले करिब ४५ सेकेण्डसम्म अनुभव लिन पाउछन् । वल्र्ड वाइड ग्रुप नेपाल प्रालिले सञ्चालनमा ल्याएको जिपलाइनको लागत ३ करोड भएको सञ्चालक बिबस भण्डारीले बताए। जिपलाइनमा क्लासिक, सुपरम्यान र कपल जिपलाइन गरि ३ प्रकार रहेको छ । क्लासिकको १२ सय, सुपरम्यान(सुतेर)को १५ सय र कपलको १८ सयदेखि २ हजार रुपैयाँसम्म पर्नेछ। क्लासिक एक्लै झुण्डिएर हुन्छ भने सुपरम्यान सुतेर हुन्छ । कपल जिपलाइनमा दुईजना आफ्नो साथीसँग अंगालो मारेर खेलिने संचालक भन्डारीले बताए।
