शनिश्चरे । मोरङ पथरीशनिश्चरे वडा नं. ४ मा सडक स्तरोन्नती कार्यको शिलान्यास भएको छ । शनिबार वडाध्यक्ष गोविन्दबहादुर भण्डारीसहित वडा सदस्यहरु र स्थानीयवासीको उपस्थितिमा देउरालीचोकमा सडक स्तरोन्नती, ग्राभेलको लागि शिलान्यास भएको हो ।
देउरालीचौक समसेरटोल आपगाछी सडक २ कि मी स्तरोन्नती नाला खन्ने काम र सोही बाटोको २६५ मिटर ग्रावेल , सेतीसील्वालटोल उत्तर ४०० मिटर लुज ग्राभेल र कोशेली चौकबाट पश्चिम प्रगति चौक हुंदै वडा कार्यालय जाने बाटो २८० मिटर १ नं. ग्राभेल गरिने वडाध्यक्ष भण्डारीले जानकारी दिए ।
आर्थिक वर्ष २०७६÷०७७ मा वडा नं. ४ को विनियोजित बजेटबाट सो कार्यका लागि वडाले १० लाख २५ हजार छुट्याएको थियो ।
उक्त सडक काविल कन्ट्रक्सनले टेन्डर प्रकृयाबाट ९ लाख ९९ हजार रुपैयाँमा निर्माणको जिम्मा पाएको वडाध्यक्ष भण्डारीले जानकारी दिए । वडाध्यक्ष भण्डारीका अनुसार निर्माण कार्य आगामी असार १५ गतेसम्ममा सम्पन्न गर्ने सम्झौता भएको छ ।
शिलान्यास कार्यक्रममा वडाध्यक्ष भण्डारीका साथ वडा सदस्यहरु तुलसादेवी दर्जी, अम्बरबहादुर बराईली, स्थानीय युवा समाजसेवीहरु राजकुमार विश्वकर्मा, नारायण दाहाल, शमशेर राईलगायतको उपस्थिति रहेको थियो ।
