नगरमा २ हजार ५ सय बढीलाई दादुरा रुबेलाको खोप

पथरी शनिश्चरे । मोरङको पथरी शनिश्चरे नगरपालिकामा ५ दिनको अवधिमा २ हजार ५ सय बढी बालबालिकालाई दादुरा र रुबेला विरुद्धको खोप र २ हजार ८ सय बढीबालबालिकालाई पोलियो विरुद्धको औषधि खुवाइएको छ ।

गत फागुन ७ गतेबाट वडा वडामा सुरु गरिएको कार्यक्रम अन्तर्गत हिजोसम्ममा ९ महिनादेखि ५ वर्षसम्मका २ हजार ५ सय २३ जनालाई दादुरा रुबेलाको खोप दिएको जनस्वास्थ्य निरीक्षक मुरारी आचार्यले जानकारी दिए । दादुरा रुबेलासँगै पोलियो विरुद्धको औषधि खुवाउने कार्यक्रममा सो अवधिमा जन्मेदेखि ५ वर्षसम्मका २ हजार ८ सय ५६ बालबालिकालाई पोलियो थोपा खुवाइएको उनले उल्लेख गरे ।

नगरपालिकाले ५ हजार ५ सय ८९ बालबालिकालाई दादुरा रुबेलाको खोप र ६ हजार ६ सय ३० बालबालिकालाई पोलियो थोपा खुवाउने लक्ष्य बनाएको छ । खोप लगाउने र औषधि खुवाउने कार्यक्रममा वडाका पायक पर्ने ३८ वटा विद्यालयहरुलाई केन्द्र बनाएर कार्यक्रम अघि बढाइएको छ । खोप लगाएपछि बालबालिकालाई खोप कार्ड समेत प्रदान गरिएको छ । दादुरा रुबेला एकप्रकारको भाइरसबाट हुने समस्याको निवारणका लागि १६ गतेसम्म अभियान सञ्चालन गरिने छ ।