पथरी शनिश्चरे । मोरङको पथरी शनिश्चरे नगर क्षेत्रमा हात्तीपाइले रोग विरुद्धको आम औषधि सेवन कार्यक्रम अन्तर्गत ४ दिनमा ३२ हजार बढीले औषधि सेवन गरेका छन् ।
मंलबार चौथो दिन वडा नम्वर १ मा १ हजार ३ सय १७, २ मा १ हजार १ सय ८, ३ मा ५ सय ४७, ४ मा ६ सय १८, ५ मा ६ सय ३८, ६ मा १ हजार १ सय २५ जनाले औषधि सेवन गरेका छन् । त्यसैगरी, वडा नम्वर ७ मा ६ सय ३१, ८ मा १ हजार १५, ९ मा १ हजार ७६ र १० मा ६ सय ४७ जनाले औषधि सेवन गरेको स्वास्थ्य शाखा प्रमुख जनस्वास्थ्य निरीक्षक मुरारी आचार्यले जनाए । चौथोदिनसम्ममा ३२ हजार २ सय ७० जनाले औषधि सेवन गरेको उनले तथ्यांक प्रस्तुत गरे।
पहिलो दिन ६ हजार १ सय ९०, दोस्रो दिन ९ हजार २ सय ४६ र तेश्रो दिन ८ हजार १ सय १२ जनाले हात्ती पाइले विरुद्धको औषधि सेवन गरेका हुन् । हात्तीपाइले विरुद्धको आम औषधि सेवन कार्यक्रमको प्रभावकारिताको अनुगमन्मा आएको संघीय सरकारको टोलीले अघिल्लो वर्षदेखि नै पथरीशनिश्चरे उत्कृष्ठ रहेको ठहर गरेको छ । सरुवा रोग नियन्त्रण महाशाखा किटजन्य रोग नियन्त्रण शाखा प्रमुख डा. प्रकाश शाह र भेक्टर कन्ट्रोल निरीक्षक उत्तराज प्याकुरेलले आज अनुममन्का क्रममा उल्लेख गर्नुभयो । उहाँहरुले जनप्रतिनिधिबाट कार्यक्रमको अपनत्व ग्रहण र कर्मचारीको उत्साहजनक लगाव रहेकाले अभियान प्रभावकारी वनेको वताए ।
औषधि खुवाउने अभियानमा नगरवासीहरुले समेत उत्साहजनक सहभागिता जनाइरहेका छन् । जसका कारण औषधि खान मिल्ने ५० हजार हाराहारीको लक्षित जनसंख्याको आधाभन्दा बढीले ४ दिनमा औषधि सेवन गरिसकेको पाइएको छ । चौथो दिन आज (मंगलबार) विहान वडा नम्वर १ मा रहेको पथरी बहुमुखी क्याम्पसमा नगर प्रमुख दिलीपकुमार राईको उपस्थितीमा औषधि खुवाउने कार्यक्रम सञ्चालन भएको थियो ।
नगरपालिका अन्तर्गतका स्वास्थ्य संस्थाका ५० जना स्वास्थ्यकर्मी र ३० जना महिला स्वास्थ्य स्वयमसेविकामार्फत एक सातासम्म घर घरमा गएर औषधि खुवाउने कार्यक्रम माघ २५ देखि अघि बढेको छ । भोली (बुधबार) वडा नम्वर १० मा रहेका भूटानी शरणार्थीको शिविरमा पनि औषधि खुवाउने कार्यक्रम रहेको छ ।
