इटहरी । नेपाल टेलिभिजन इटहरी प्रसारण केन्द्रबाट प्रशारण सुरु भएको छ । प्रधानमन्त्री केपी शर्मा ओलीले भिडियो कन्फेरेन्समार्फत केन्द्र उद्घाटन गर्दै एनटिभी इटहरी प्रसारण केन्द्र सुरु गरेका हुन् । सो प्रसारण केन्द्रले प्रदेश १, २ दुई तथा सिङ्गो राष्ट्रको समृद्धिमा टेवा पुर्याउने ओलीले बताए । नेपाल टेलिभिजनको ३५औँं वार्षिकोत्सवका अवसरमा इटहरीबाट प्रसारण थालनी गरिएको केन्द्रको प्रधानमन्त्री ओलीले सिंहदरबारस्थित प्रधानमन्त्री कार्यालयको एक्सन रुमबाट बटन थिचेर शुक्रबार उद्घाटन गरे ।
कार्यक्रमका सूचना तथा प्रविधिमन्त्री गोकुलप्रसाद बाँस्कोटाले आफ्नो क्षमता, दक्षता र योग्यताका आधारमा मात्र मर्या्दित र गुणस्तरीय पत्रकारिता गर्न सञ्चारकर्मीलाई आग्रह गरे । नेपाल टेलिभिजनले अब केही समयपछि अङ्ग्रेजी भाषामा एनटिभी वल्ड च्यानलका रुपमा चौबीसै घण्टा प्रसारण गर्न लागेको उनले बताए । “एनटिभीलाई सशक्त सञ्चारमाध्यमको रुपमा स्थापित गरिने छ, अब देशलाई डिजिटल रुपान्तरण गरिने छ, धरानमा डाटा सेण्टरसमेत बनाइने छ”, उनले भने ।
नेपाल टेलिभिजनका कार्यकारी अध्यक्ष डा महेन्द्र विष्टले इटहरी च्यानल एनटिभीको पाँचौँ च्यानल भएको बताउँदै केन्द्रले स्वायत्त निकायका रुपमा प्रसारण सेवा पुर्याउने बताए । प्रदेश नं १ का कानून तथा आन्तरिक मामिलामन्त्री हिक्मतकुमार कार्कीले इटहरीलाई स्मार्ट सिटी बनाइने बताए । रासस
