मोरङको रंगेली नगरपालिका ९ झमनपुरका ३० वर्षीय अविनारायण भण्डारीले मंगलबार साँझ आफ्नै घर, गाई गोठ र बाख्रा फार्ममा आगो लगाएका छन् ।
इन्द्र भण्डारीका छोरा अविनारायणले आगो लगाउँदा दुईवटा घर, गाईगोठ र बाख्रा फार्मममा क्षति पुगेको प्रहरीले जनाएको छ । अविनारायणको मानसिक सन्तुलन ठीक भएको नपाइएको प्रहरीको भनाइ छ । मोरङ प्रहरीका प्रवक्ता डीएसपी मानबहादुर राईले घटनामा १० लाख बढीको क्षति भएको बताए । स्थानीय बासिन्दा, प्रहरी र दमकलको सहयोगमा आगो तत्काल नियन्त्रणमा लिन सकेका कारण ठूलो क्षति भने हुन नपाएको प्रहरीले जनाएको छ ।
त्यस्तै मोरङकै कटहरी गाउँपालिका ७ का योगेन्द्र मेहताको कर्कटपातको छानो भएको एक तले घरमा बुधबार बिहान १ बजे आगलागी भएको छ । आगलागीमा घर, घरमा भएका सबै सामान जलेर ध्वस्त भएको प्रहरीले जनाएको छ । आगोले जलेर एउटा बाख्रो पनि मरेको छ । आगलागीमा तीन लाख बराबरको क्षति भएको प्रहरीले जनाएको छ । आगलागीको कारण खुल्न नसकेको र घटनाका बारेमा अनुसन्धान सुरु गरिएको प्रहरीले जनाएको छ ।
